-Almmuhus-
-Almmuhus-
OĐĐASAT Ođđa direktevra Finnmárkku buohcciviesus

Ođđa direktevra Finnmárkku buohcciviesus

-

-

Finnmárkku buohcciviesu stivrras lea leamaš stivračoahkkin ja virgádan Finnmárkku buohccivissui ođđa hálddašeaddji direktevrra.  

Siri Tau Ursin barggai ovdalaččas Helgelándda buohcciviesu prehospitala bálvalusaid ovttadatdirektevran. Sus lea guhkes klinihkalaš bargovásáhus anestesiodoavttirin, ja sus leat leamaš máŋga hoavdavirggi Stavanger universiteahttabuohcciviesus. Dasa lassin lea sus spesialiserendálkkasoahppu.

– Stivra lea hui duđavaš dainna go Siri Tau Ursin lea váldán vuostá fálaldaga álgit Finnmárkku buohcciviesu hálddašeaddji direktevran. Son lea čielggas ja čohkkejeaddji jođiheaddji gii oažžu bargiid mielde, sus lea buorre ovttasteapmi, strategalaš ja guorahalli návccat, ja buorit čađahannávccat. Dasa lassin berošta son ođđafuomášumis, ođđaárvalusas ja mo mii galgat ovttas hálddašit resurssaid mat mis leat buoremus lági mielde. Dat lea dehálaš go mii galgat joatkit Finnmárkku fálaldagaid ovddidemiin, dadjá stivrajođiheaddji Lena Nymo Heili.

Tau Ursin lea 57 jagi boaris ja lea Tauas eret Stavangera olggobealde, lea náitalan, leat njeallje rávis máná ja okta mánáidmánná. Son lea bargan buot Davvi-Norgga fylkkain, ja čađahii turnusjagiid Hámmárfeastta buohcciviesus ja Álttá suohkanis.

– Mun illudan bargagoahtit dán barggus, ja oahppat olles Finnmárkku dovdagoahtit. Finnmárkku buohcciviessu lea okta dain gáidoseamos dearvvašvuođafálaldagain mat mis leat riikkas, mas leat guhkes gaskkat, bieđggus ássanguovllut, ja dálkkádatdilálašvuođat mat dávjá dahket ahte ferte smiehttat earáládje go eará dearvvašvuođafálaldagain. Dat dagahage ahte Finnmárkku buohcciviesus leat gelddolaččamus dearvvašvuođafálaldagat, dadjá Siri Tau Ursin.

Tau Ursin álgá ámmáhii Finnmárkku buohcciviesu  hálddašeaddji direktevran čakčamánu 1. beaivvi.

 

- Advertisement -
-Almmuhus-