Bearjadaga rahpasa ođđa oassi sámedikkevisttis Kárášjogas, ja lea ođđa dáidagiin čiŋahuvvon.
Bearjadaga rahpasa ođđa oassi sámedikkevisttis Kárášjogas, ja lea ođđa dáidagiin čiŋahuvvon.
Suomabeale sámi dáiddár Outi Pieski (riegádan 1973) lea ráhkadan tekstiila-dáidaga Leagi vuoigŋa / Spirit of the Valley, mii heaŋgá dáhkis ođđa visttis mii gullá Sámediggái. Lea maid ráhkaduvvon sierra Kåre Kivijärvi ossodat visttis, ja Kivijärvi govvačoakkáldaga leat ođđasit deaddelan.
– Outi Pieski lea ođđa buolvva dáiddár, gii čájeha čielga čanastagaid árktalaš kultuvrii sámi identitehtain ja historjjáin dálááigásaš dáiddagielain, dadjá kuráhtor Trude Schjelderup Iversen.
Vistti hápmi
Stein Halvorsen Arkitekter lea tevdnen sihke váldovistti ja ođđa vistti, mas leat eanet kontorsajit ja joavkolanjat dievasčoahkkimiidda.
– Nu go váldovisttis, lea hápmi ráhkaduvvon luonddu lagasvuhtii. Sámedikkis lea čáppa várdu duoddarii, ja Halvorsen lea dan geavahan nuppelágan perspektiivas hámis nu ahte boastut ipmirdat man guhkki lea gaskal uvssa ja seainni mii lea láses. Ipmárdus lea iešguđetlágan das gos olmmoš geahččá. Outi Pieski dáidda lea ráhkaduvvon maid dakkár hámi ja jurdaga mielde, muitala Schjelderup Iversen.
Dehálaš govvadáiddár
Okta dain deháleamos dáiddáriin Sámis maŋŋel 1945, lea Kåre Kivijärvi. Guokte gova maid Kivijärvi lea govven, ledje Sámedikki váldovistti seainnis, muhto ferteje gádjut govaid dušše jagi maŋŋel go ledje biddjon seaidnái 1999:is, go govvabábir lei billahuvváme. Dál leat dát guokte gova “stuora báŋkkuin” (1972/1994) ja “Unjárgga portreahtta” (1972) ođđasit deaddeluvvon, rámmejuvvon ja biddjon seaidnái sámedikki ođđa visttis. Doppe leat vel guhtta guovddáš govat maid Kivijärvi lea govven 1966:s mii lea nuorttalaš nissonolbmuid birra.
Vistti ja čájáhusa almmolaš rahpandoalut leat bearjadaga skábmamánu 20.beaivvi, Sámedikkis Kárášjogas.
