-Almmuhus-
-Almmuhus-
OĐĐASAT – OD-beaivvi ulbmil lea beare politihkalaš

– OD-beaivvi ulbmil lea beare politihkalaš

-

-

Odne lea OD-beaivi, muhto Sámi joatkka- ja boazodoalloskuvla ii doarjjo OD-ulbmila dán jagi. Dan sadjái sii čogget ruđa Mama Sara Education Foundationii.

Jahkásaččat bidjet oahppit olles Norggas ovtta skuvlabeaivvi ruhtačoaggimii iešguđetlágan ulbmiliidda.

Juohke jagi lea ođđa ruhtačoagginulbmil, ja dán jagi lea OD-stivra mearridan ahte áigot doarjut Palestina nuoraid barggu háhkat alcceseaset buoret boahtteáiggi.

 


Sámi joatkka- ja boazodoalloskuvlla ohppiidráđi jođiheaddji, Elle Rávdná  Näkkäläjärvi. Priváhtagovva.

Guovdageainnu nuorat eai doarjjo

Joatkkaskuvllaid oahppit besset ieža mearridit áigot go doarjut OD vai eai, ja dán jagáš ruhtačoagginulbmila dihte lea čuožžilan garra digaštallan. 

<!–*/

/*–>*/

OD-ulbmil galgá leat neutrála ulbmil, muhto oallugat oaivvildit ahte dán jagáš doaibmaoasálaš, KFUK-KFUM Global, ii leat neutrála.

Čuoččuhuvvo earret eará ahte dát searvi aktiivvalaččat boikohtte Israela gálvvuid. 

– OD-stivra meinejit ahte dán jagáš OD-ulbmil ii leat politihkalaš, ja nu orruge álggos. Muhto go lohká veahá čiekŋaleappot, de oaidná ahte olles ulbmil lea politihkalaš. Mii oktan skuvlan eat hálit doarjut ovtta beali dán soahpameahttunvuođas, mii lea ná kompleaksa go lea, lohká Sámi joatkka- ja boazodoalloskuvlla ohppiidráđi jođiheaddji, Elle Rávdná Näkkäläjärvi Ávvirii.

 

Solidaritehtakafeja

Operasjon Dagsverk 

– OD mearkkaša Operasjon Dagsverk, ja lea álggahuvvon 1964:s, Norsk Gymnasiastsamband (NGS) riikačoahkkimis.

– Operasjon Dagsverk lea Norgga stuorimus solidaritehtaakšuvdna nuoraide.

– Operasjon Dagsverkas leat iešguđetlágan fáttát juohke jagi. OD lea bargan earret eará eastadit olmmošvuovdima ja veahkaváldiváttisvuođaid, muhto maiddái leat bargan arvevuvddiid gáhttemiin. Oktasašfáddán dattetge lea álo oahppu.

– Sáhttá ieš válljet áigu go oasálastit OD-beaivvis.

– Operasjon Dagsverk geahččala bargat dan ovdii ahte buot nuorat galget oažžut seamma rivttiid ohppui, ja doarju álo oahppo- ja oahpahanprošeavttaid Afrihkás, Asias dahje Latin-Amerihkás.

– Operasjon Dagsverk ovttasbargá báikkálaš servviiguin lulde.

Gáldu: od.no

Dan sadjái go čoaggit OD-beaivvi ulbmilii ruđa, leat Guovdageainnu nuorat mearridan eará ulbmila váste čoaggit ruđa.

Ohppiidráđis leat mearridan doallat solidaritehtabeaivvi Mama Sara Education Foundation prošeavtta ovddas dan sadjái go doarjut OD-beaivvi.

Sámi joatkka- ja boazodoalloskuvlla rektora, Ellen Inga O. Hætta, mielas lea dát buorre mearrádus.

– Go sámi servodagas lea ná initiatiivarikkis olmmoš go Mama Sara, de orru dat hui riekta su gudnejahttit ja čájehit ahte sámi servodat lea su duogábealde.

 

Doarjut olmmošvuoigatvuođaid

OD-jođiheaddji Frida Jøraholmen Andresen mielas lea šállošahtti go oahppit eai vállje doarjut dán jagáš OD ja vástida čuoččuhussii ná:

– Lea hui šállošahtti go oahppit eai vállje doarjut dán jagáš OD, muhto OD galgá leat eaktodáhtolaš ja dan leat álo oaivvildan. Lea riekta ahte KFUK-KFUM Global doarju okkupašuvdnagálvoboikohta, muhto dat ii leat oassin OD-prošeavttas, čilge Jøraholemn Andresen.

 

Oahppit čuoččuhit maid ahte dán jagáš OD-ulbmil lea politihkalaš, vaikko OD-stivra meine ahte dán jagáš OD-ulbmil ii leat politihkalaš.

– Min sáhttá lohkat politihkalažžan danne go mii háliidit addit nuoraide vejolašvuođa váikkuhit, muhto mii eat leat váldan beali soahpatmeahttunvuođas eat ge leat eambbo politihkalaččat go ahte mii háliidit buohkaid olmmošvuoigatvuođaid doahttalit.

- Advertisement -
-Almmuhus-