Oappázat Ellen Oline Eira, Mina Helene Eira ja Laila Kristine Eira leat guorastan áhčiset bálgá, ja leat dál searvan Sámi Parlamentáralaš Ráđi nuoraidkonferánsii. Konferánssas áŋgiruššet nuoraid politihkas, ja dat lea sin mielas dehálaš.
Odne lea Sámi Parlamentáralaš Ráđi nuoraidkonferánsa Troandimis. Sámi nuorat buot njealji riikkas leat boahtán čuovvut konferánssa, ja digaštallat sámepolitihka.
Oappážagat, Ellen Oline Eira (20), Mina Helene Eira (16) ja Laila Kristine Eira (15) leat Mázes boahtán Troandimii čuovvut SPR nuoraidkonferánssa.
– Orui hui somá fitnat dáppe nuoraidkonferánssas, lohká Laila Kristine.
– Ja lea buorre vejolašvuohta oahpásnuvvat buot njealji riikka sámi nuoraiguin, lasiha Mina Helene.
Politihkar-áhčči hástán searvat
Sin áhčči lea Hans Ole Eira. Son lea Norgga Boazosápmelaččaid Riikkasearvvi ja Guovdageainnu johttisápmelaččaid listtu politihkar. Sii muitalit ge ahte lei son guhte muitalii konferánssa birra ja hásttii sin searvat.
– Son liikui go mii buot golmmas beasaimet deike, lohká Mina Helene.
Mina Helene mielas lea miellagiddevaš fáddá konferánssas, beroštupmi ja áŋgiruššat sámi politihkas.
– Lea dehálaš ahte sámi nuorat dál juo áŋgiruššagoahtit, go leat olu áššit man ovddas mii fertet doarrut, ja man ovddas mii fertet bargat.
Boazodoalloáššiid vuolgán gullat
Ellen Oline lohká ahte vuosttažettiin lei miella vuolgit go lea 100-jagi ávvudeapmi, muhto illuda gullat boazodoalloáššiid digaštallamiid konferánssas.
– Dá lea hui buorre vejolašvuohta ságastallat eará guovllu sámiiguin, gullat makkár dilli sis lea ja makkár oaivilat sis leat. Earret eará Girjas-ášši Ruoŧa bealde galgá digaštallojuvvot, ja Kalvvatn orohaga ášši, dan orru mu mielas hui miellagiddevaš gullat.
Ellen Oline muitala ahte su váibmoáššit leat boazodoalloáššit.
– Lea ovtta lági mielde buorre gullat ahte earáin leat maid váttisvuođat, go muhtumin sáhttá dovdat iežas hui akton, lohká son.
