Guovdageaidnulaš Nils Johan Vars lohká smávva sihkkelgilvvuid dehálažžan, dan sivas go leat mielde váikkuheamen movttiidahttit olbmuid sihkkelvaláštallamii. Das buollái maiddái su gilvomokta.
Guovdageaidnulaš Nils Johan Vars lohká smávva sihkkelgilvvuid dehálažžan, dan sivas go leat mielde váikkuheamen movttiidahttit olbmuid sihkkelvaláštallamii. Das buollái maiddái su gilvomokta.
Vuollel diimmu geahčen duolmmasteaba Nils Johan Vars ja Nils Åge Hætta (Team Pitstop Kautokeino) of300 gilvui vuosttas háve. Soai leaba álggahallit meahccesihkkelastin gilvvus, mii govviduvvo oktan máilmmi garraseamos gilvun.
Bingesis álggii
Ávviris lea vel nubbi journalista Nils Johan Vars, gii oasálastá dán jagáš of300 gilvvuide.
Son muitala báikkálaš smávva gilvvu Bingesrittet movttiidahttán iežas hárjehallat ja ožžon beroštumi sihkkelastimii.
Bullehii beroštumi
Son searvvaige vuosttaš háve 2013:s Bingesrittet gilvui ja beasai dovdat mo lea ráhččat badjelaš viđa miilla guhkkosaš meahccesihkkelastimis.
– Dat lea dego dat vuolimus mihttu maid sáhttá čađahit. Go mun vuosttaš háve serven, de in lean goassige sykkelastán nie guhkes mátkki. Go čađahin gilvvu, de dan maŋŋel buollái mu sykkelastin beroštupmi, go oidnen ahte iihal diet lean mihkkege mátkki, muitala son.
Gávnnai gilvoguoimmi
Vars ii loga iežas vuosttaš sihkkela leamaš beare áktánassan ja osttii buorebuš vuojána, mainna beasai hárjehallagoahtit.
– Bingesrittet lei álot dego dat mihttu. Doppe mun maiddái bessen deaivat olbmuid, geain leat seamma beroštumit ja doppe deivenge maiddái iežan gilvoguoimmi, muitala son.
Dasa lassin searvvai Vars vuosttaš háve Sávkadasrittet gilvui diibmá ja beasai vásihit bárttiid, maid ii ovdal lean vásihan.
– Vaikko mun in lean searvan nu ollu gilvvuide, muhto ledjen sykkelastán ollu. Dán gilvvus vásihin goittot vuosttaš háve go juvla ráigánii, iige dušše oktii, muhto guktii. Mun fidnen divuheamen sykkela ja dulbmen dan oanehis gilvomađiija, mii lea 21 kilomehtera guhku, čilge son.
Liikui “čađaheaddji” báidái
Guovdageaidnulaš rámidage iežas bargoskihpára Alice Balto, gii goalmmát háve jo searvá gilvvuide ja háliidii maiddái geahččalit.
– Mu mielas lei nu čaffat dat báidi, man oažžu maŋŋel go lea čađahan gilvvu. Moai leimme gal jo ovddit jagi hupman Leif Ågen, ahte livčče somá searvat ja diibmá maŋŋel Binges gilvvuid moai mearrideimme searvat dán jagi of300 gilvvuide. Dainna eavttuin ahte gávdne ruhtadeaddji, go lea nu divrras searvat, čilge Vars.
Dál leabage ráhkkaneamen duolmmastit gilvui ja Vars lohká čoliid vel čagalduhttit.
