Riddu Riđu oktavuođas lágiduvvo čájáhus ja seminára mii galgá čalmmustahttit eamiálbmotdáidaga.
Riddu Riđu oktavuođas lágiduvvo čájáhus ja seminára mii galgá čalmmustahttit eamiálbmotdáidaga.
Jagi 2013:s álggahuvvui «Álgoálbmogiid dáidda- ja kulturovdanbuktin davviguovlluin» prošeakta mas Sámi dáiddár ovttasbargá Ruošša álgoálbmot dáiddáriiguin. Prošeakta bistá oktiibuot golbma jagi, ja oassi sin barggus galgá čájehuvvot Riddu Riđu oktavuođas. Dasa lassin lágiduvvo seminára gos olbmot besset oahpásmuvvat eamiálbmogiid dáiddamáilmmiin.
Ovdanbuktinčájáhus
Olmmáivággilaš Geir Tore Holm lea ovttasbargan dáiddárguovttuin Julia ja Jevgenji Porotov:in geat gullaba Taimyr:i ja Ataj:i Sibiras. Odne eahkedis rahpasa Davvi álbmogiid guovddáža museas digitála čájáhus mii čalmmustahttá dáiddalaš ovttasbarggu.
– Beassat oaidnit govaid earret eará sin deaivvademiin, bargguin ja mátkkiin maid leat čađahan dássážii dán prošeaktaáigodagas. Áigumuš lea ahte dáiddárat čatnet oktavuođaid ja ovttasbarget maiddái boahtte áiggis, lohká prošeaktajođiheaddji Borghild Braastad.
Eamiálbmotdáiddaseminára
Bearjadaga ges bovdejuvvojit olbmot seminárii gullat mii geavvá eamiálbmogiid dáiddamáilmmis.
– Lea dehálaš čalmmustahttit eamiálbmotdáiddáriid ja sin dáiddalaš bargguid álbmogiid. Mun illudan guldalit dáiddáriid geat muitalit iežaset doaimmaid birra, lohká Braastad.
Seminára lágiduvvo Áillohaš-rohki Lásságámmis Ivgovuonas.
Viiddis dáiddamáilbmi
Semináras oasálastet Geir Tore Holm, Julia ja Jevgenji Porotov. Dasa lassin boahtá Canada dovddus dáiddár ja eamiálbmotovddasteaddji Shelley Niro. Six Nation lea dán jagáš erenomáš davvi guosseálbmot Riddu Riđu festiválas ja dan oktavuođas lea Niros sierra dáiddačájáhus.
– Dáiddárat gullet hui iešguđet guovlluide máilmmis, muhto seammás leat eamiálbmogiid seamma vásáhusat ja historjját. Olu eamiálbmogat leat vásihan koloniserema ja dáidaga bokte čalmmustahttet go sii leat gieđahallan vásáhusaid. Dáiddárat geat oasálastet semináras leat čeahpit ja sii leat gievrrat, loahpaha prošeaktajođiheaddji Borghild Braastad.
Prošeavtta ruhtada Barentsčállingoddi ja Norgga kulturdepartemeanta, Davvi álbmogiid guovddáš jođiha prošeavtta.
