Romssa ja Finnmárkku fylkkagielda lea vuolláičállán šiehtadusa Selfa Arcticain hukset ođđa oahpahusfatnasa Sáččá joatkkaskuvlii.
Oahpahusfatnasa galget oahppit geavahit geat vázzet alit luonddudoalloluohkás Gibostadas.
– Ođđa oahppofatnasiin beassat mii ovddidit praktihkalaš oahpu ohppiide geat vázzet alit suorggi. Teknihkalaš ovdáneapmi fatnasiin manná jođánit, ja mii leat movtta go beassat ođasmahttit, maiddái dán guovllus, dadjá rektor Stein-Erik Svendsen.
– Romssa ja Finnmárkku fylkkagielda lea dahkan čorgadis ja vuđolaš proseassa, ja dat šaddá boahtteáigásaš fanasin mas lea oalle ruoná profiila. Mii leat movttegat go Sáččá joatkkaskuvlla oahppit galget oažžut oahpu min fatnasa alde, dadjá Ivar Jakobsen, Selfa Arctic ođđahuksehusa ossodathoavda.
