Sámeráđđi áigu doarjut Fiettar orohaga vaikke riikkaidgaskasaš dásis, vai nagodit bissehit ruvkeplánaid.
Sámeráđđi áigu doarjut Fiettar orohaga vaikke riikkaidgaskasaš dásis, vai nagodit bissehit ruvkeplánaid.
Juovlamánu 8. beaivvi atti Birasdirektoráhtta Nussir ASA ruvkefitnodahkii lobi luoitit ruvkebázahusaid Riehpevutnii. Olusat leat dulkon Birasdirektoráhta mearrádusa nu ahte dál lea maiddái ruvkedoaibmalohpi addon dán fitnodahkii, nu ii leat, oaivvildit Sámeráđi bealis.
– Nussirii ii rahpas ruvki, dadjá Sámeráđi presideanta Áile Javo preassadieđáhusa bokte.
Stuorra váikkuhusat boazodollui
Jus Nussirii rahpasa ruvki de dat garrasit čuozašii guovllu boazodollui.
– Jus Nussirii álggahit ruvkedoaimma de dat uhkida olles Fiettar orohaga boazodoalu. Fiettarii lea jo erenoamáš garrasit čuohcan dat go guovllus leat eará sisabahkkemat, go buot sisabahkkemiid váikkuhusat biddjojit oktii de čájehuvvo ahte orohat ii oba gierdda ge ruvkki vel lassin, dadjá Ragnhild Marit Sara, guhte leat orohaga juridihkalaš ráđđeaddi.
– Boazodoalu beroštumit, dárbbut ja vuoigatvuođat leat ollásit badjelgehččon dán proseassas, vaikke buot guorahallamat čájehit ahte dákkár doaibma buvttášii heajos váikkuhusaid sámi ealáhussii, joatká Sara.
Galget soabadit
Norgga ráđđehus lea ovdalaččas cealkán ahte jus Nussirii galggaš rahppot ruvki, de ruvkefitnodat ferte boahtit ovttaoaivilvuhtii guovllu boazodoallorohagain.
– Mii jáhkkit ráđđehusa bisuhit iežas mearrádusa, iige atte Nussir ASA fitnodahkii ruvkelobi Fiettar orohaga dohkkeheami haga. Muhto vaikke vel ráđđehus ii doalašiige lohpádusas, de Nussirii goittot ge ii rahppo ruvki go dat rihkošii riikkaidgaskasaš lágaid. Fiettar vuojeha ášši diggái jus šattaš dárbu, maiddái riikkaidgaskasaš dássái, bissehan dihte ruvkeplánaid, dadjá Sara.
Vuorkágovva
Sámeráđđi ain doarju
Sámeráđđi lea dorjon Fieddara dán proseassa álggus jo.
– Sámeráđđi joatká fállat buot min čehppodaga doarjjan Fieddarii vai ruvkeplánat bissehuvvojit, diggeáššiid dáfus maiddái. Ruvkefitnodat, Norgga stáhta ja Norgga eiseválddit leat dán rádjai ollásit badjelgeahččan sámiid vuoigatvuođaid álgoálbmogin, ja dat boahtá ovdan jus mii šaddat dán ášši vuojehit riikkaidgaskasaš dássái, lohká Áile Javo.
Áigot várohit ruhtadeddjiid
Ráđđehusa mearrádusa maŋŋil lea Nussir ASA almmuhan ahte garraseappot rahčagohtet gávdnat ruhtadeddjiid ruvkeprošektii.
– Sámeráđđi áigu sihkkarastit ahte vejolaš ruhtadeaddjit ožžot vuđolaš dieđuid das ahte jus Nussirii rahppo ruvki de dat lea duođalaš olmmošvuoigatvuohta rihkkun, iige das šatta goassege mihkkege, nu ruhtadeaddjit duššái atnet ruđaideaset jus mearridit investeret Nussir ruvkeprošektii, lohká Javo.
