Guhkesbearjadaga čuojahit nuorra sámi artisttat Guovdageainnu beassášmárkaniin. Dasa lassin almmuha báikkálaš beakkálmas ođđa skearru.
Sámi musihkkafestivála almmuha guhkesbearjadaga artisttaid, nuorra čuojaheaddjit guoimmuhit Báktehárjjis Guovdageainnus. Oktiibuot njeallje konsearta čuojahuvvojit ja sámi rap-artistta almmuha EP-skearru.
SGP-vuoiti
Juoigi Jörgen Stenberg lea ruovttoluotta Guovdageainnus. Son lea ovdal vuoitán Sámi Grand Prix juoigangilvvu ja beaggá čeahpes juoigin. Go Stenberg boahtá Ruoŧa Sámis beassášmárkaniidda, de lea sus olles čuojahanjoavku mielde.
Ođđa skearru
Ohcejohkalaš rap-artistta Ailu Valle boahtá Guovdageidnui joavkkuinis Trio Boogiemen. Son ráppe sámi servodaga birra ja eará áššiid birra mat su áŋgiruššet. Maiddái báikkálaš beakkálmas Slincraze lávke lávdái. Mázelaš almmuha maiddái ođđa EP skearru ruovttubáikkistis guhkesbearjadaga.
Áidna konsearta
Konseartaeahkeda loahpaha Kárášjoga joavku Felgen orkester. Joavku mas vilbeležagat čuojahit lea guhká beaggán Sámis, ja erenomážit Kárášjogas ja Guovdageainnus. Felgen orkester čuojaha dušše ovtta konsearta dáid beassážiid, ja dat dáhpáhuvvá ge Guovdageainnus guhkesbearjadaga, dieđiha Sámi musihkkafestivála preassadieđáhusas.
