Nuoraidvaláštallan lei guovddášfáddán go Finnmárkku Valáštallanguovlu čoahkkanii jahkečoahkkimii Leavnnjas mannan vahkkoloahpa. Boađusin šattai ahte nuorra olmmoš válljejuvvui Finnmárkku Valáštallanstivrra stivralahttun.
Nuoraidvaláštallan lei guovddášfáddán go Finnmárkku Valáštallanguovlu čoahkkanii jahkečoahkkimii Leavnnjas mannan vahkkoloahpa. Boađusin šattai ahte nuorra olmmoš válljejuvvui Finnmárkku Valáštallanstivrra stivralahttun.
– Lei buorre deaivvadeapmi. Vaikko eai lean stuora lossa áššit, de lean hui ilus go nu máŋggas bivde sáni ja oassálaste áššiin maid meannudeimmet, muitala May Bente Eriksen, gii ođđasit válljejuvvui stivrajođiheaddjin iežas goalmmát áigodahkii Finnmárkku Valáštallanguovllus.
Nuoraidvaláštallama birra seminára
Badjel 60 olbmo serve seminárii ja sis lei 42:s jienastanvuoigatvuohta jahkečoahkkimis. Ovdal go jahkečoahkkin álggii, de lágiduvvui seminára nuoraidvaláštallama birra. Ollu evttohusat bohte, nu go čuovvoleapmi go nuorat fárrejit eret, nuvttá rusttetgeavaheapmi ja doaimmashehttejuvvon valáštalliide fálaldat.
Ođđa stivra
Ođđa stivra válljejuvvui Finnmárkku valáštallanstivrii, ja 17-jahkásaš Čáhcesullo nieida, Otilie Næss, lei evttohuvvon vuosttaš várrelahttun, muhto son evttohuvvui válljejuvvot fástalahttun stivrii.
Ođđa stivrras leat dál jođiheaddji May Bente Eriksen Báhccavuonas eret, nubbijođiheaddji Bjørn Roald Mikkelsen Álttás eret, ja stivralahtut Ole Dyrstad Davvinjárggas eret, Jørunn Margrethe Iversen Hámmárfeasttas eret ja Otilie Næss Čáhcesullos eret. Várrelahtut leat Katrine Figenschau Olsen Mátta-Várjjagis eret ja Erik Karlstrøm Álttás eret, čállá Finnmárkku Valáštallansearvi neahtas.
Áŋggirdeaddjit ožžo rámi
Finnmárkku valáštallamis leat ollu áŋggirdeaddjit ja ollu diimmut mannet eaktodáhtolaš bargguide Finnmárkku báikkálaš valáštallanservviin.
Feastamállásiin adde gudnebálkkašumi guoktásii; Evy Akselsen IL Nordkyn, gii lea 31 jagi leamašan báikkálaš valáštallanstivrras mielde, ja bargan eaktodáhtolaččat turnbirrasis ja ollu eará doaimmahan.
Nubbi gii oaččui gudnebálkkašumi lea Steinar Persen Leavnnja vuodjansearvvis go lea ollu doaimmahan. 7-jahkásažžan álggii valáštallat ja lea joatkán sihke valáštallin ja hárjeheaddjin, ja lea oassálastán iešguđet valáštallamis.
