Reŋko nuoraidfitnodat oaččui nuppi saji shell innovašuvdnabálkkašumi suorggis dán bearjadaga.
Reŋko nuoraidfitnodat oaččui nuppi saji shell innovašuvdnabálkkašumi suorggis dán bearjadaga.
Gilvvus ledje mielde oktiibuot 74 nuoraidfitnodaga, main ledje iešguđetlágan ja miellagiddevaš gálvvut maid sii ledje buvttadan dán skuvlajagis, ja gilvvohalle 17 surggiin. Finnmárkku joatkkaskuvllain ledje mielde Magic Cup UB ja Humanity UB Girkonjárgga joatkkaskuvllas, ja Reŋko ohppiidfitnodat Kárášjoga joatkkaskuvllas, čállá NRK Sápmi. Reŋko nuoraidfitnodat ledje hui duhtavaččat, ja lohke maŋŋil ahte sii ledje gal juo vuordán goit ovtta vuoittu fasket.
Garra gilvu
Nuoraidfitnodagat gilvaledje finálas beassat viidáset Europagilvui Sveitsii dán geasi, masa dušše okta nuoraidfitnodat beassá mielde. Sullii 100 duopmára ledje meassuin válljeme fitnodagaid mat ožžo bálkkašumiid iešguđet surggiin. Oahppit ovdanbukte iežaset fitnodagaid sihke stándas ja lávddis. Sii ságastalle duopmáriiguin, ja buot buoremus fitnodagain ferte leat nanu ja luohtehahtti fitnodatplána.
Dehálaš nuoraide boahtteáiggis maid
Norgga stáhtaministtar Erna Solberg lei maid boahtán meassu rahpamii.
– Ráđđehus atná nuoraid árvvus! Ungt Entreprenørskap lea dehálaš institušuvdna mii boktá nuoraid duddjonnávccaid, mii fas lea ávkin boahtteáiggi bargosajiid ásaheapmái, muitalii stáhtaministtar.
Geahča dáppe buot bálkkašumiid maid gilvvus juhke nuoraidfitnodagaide.
