Jándoris leat birrasii vihttalogis dieđihan miellahttun Norgga Sámi Riikkasearvái. Jođiheaddji Beaska Niillas lohká ahte dat čájeha NSR:s lea áin stuora doarjja, vaikko sámediggeráđđi gomihuvvui ikte.
Jándoris leat birrasii vihttalogis dieđihan miellahttun Norgga Sámi Riikkasearvái. Jođiheaddji Beaska Niillas lohká ahte dat čájeha NSR:s lea áin stuora doarjja, vaikko sámediggeráđđi gomihuvvui ikte.
Ikte, maŋŋil go Aili Keskitalo luobai sámedikkepresideantan, álggii kampánja leavvat sosiála mediain. NSR álggii čoaggit miellahtuid, ja olbmot sáhtte SMS bokte dieđihit iežaset mielde Norgga Sámiid Riikkasearvái.
Movttet go olu miellahtut servet
NSR sektretariáhta jođiheaddji Thomas Myrnes Nygård duođašta Ávvirii ahte sis lea miellahttulohku lassánan birrasii 50 miellahtuin maŋemuš jándoris. NSR jođiheaddji Beaska Niillas lea hui movttet, ja lohká ahte dá lea čielga mearka ahte olbmot eai leat duhtavaččat dainna mii dál Sámedikkis dáhpáhuvvá.
– Mii leat oaidnán maŋemuš áiggi, maid Bargiidbellodat lea dadjan maŋemuš minerálaealáhusaid birra, ja jáhkán ahte olbmot bidje ovtta ja ovtta oktii, ja ožžo guokte. Bargiidbellodat lohke čielgasit ahte galgá rahpat ruvkedoaimmaide, ii ge duššo bissehit. Dás ii leat sáhka bisseheamis, lohká NSR jođiheaddji. Son oaivvilda ahte das lea sáhka bealuštit sámi rivttiid.
– Adno čielga sámi jietna
– Dál orru nu ahte dáčča bellodagat vuojehit mátta politihka Sámediggái, ja jáhkán adno čielga sámi jietna. Mun oainnán ahte NSR lea áidna molssaeaktu dál. Ovttas Johttisápmelaččaid listtuin ja Åarjel-Saemiej Giёlh, mat ledje áidna bellodagat mat eai jienastan NSR ráđi gomiheapmái. Eai leat galle čielga sámi jiena báhcán, lohká Beaska Niillas.
Son muitala ahte facebookas vulggii miellahttu kampánnja ieš, ja easka go lei veaháš leavvan sosiála mediain, de čuovvolii NSR maid.
– Dát olu ođđa miellahtut čájehit ahte mis lea áin stuora doarjja, ja orru boktán olbmuid. Mii leat giitevaččat, ja buot ođđa miellahtut leat bures boahtimat, lohká Beaska Niillas. Son lohká ahte go ná olu ođđa miellahtut bohte searvái, movttiidahttá ja addá searaid joatkit politihkkalaš bargguiguin.
