NSR lea beahtahallan go dovdá sámi mánáidgárddiid badjelgehččon reviderejuvvon bušeahtas.
NSR lea beahtahallan go oaivvildit Sámedikki eanetloguovttastumi, gos lea Bargiidbellodat, Olgeš, Ovddastusbellodat ja Hartvik Hansen, badjelgehččet sámi mánáidgárddiid reviderejuvvon bušeahtas.
– Lea čalbmáičuohcci ahte Sámedikki eanetloguovttastupmi ii hálit geavahit dan 5 miljovnna mii lei reviderejuvvon stádabušeahtas mánáidgárddiide, sámi mánáide ja mánáidgárddiide, dadjá sámediggeáirras Aili Keskitalo (NSR).
Dárbbašit doarjaga
NSR, ÅaSG ja Johttisámelisttu árvaledje geavahit 3,8 miljovnna dan 5 miljovnnas sámi giellaguddiide mánáidgárddiin.
– Mii gullat mánáidgárddiin ahte sii dárbbašit eambbo fokusa gillii. Dál sáhttá sámediggi veahkehit mánáidgárddiid dainna, ja dat boađášii stuora ávkin sámi mánáid giellaovdáneapmái, dadjá ÅaSG sámediggeáirras Jovna Zakharias Dunfjell.