NRK sápmi leat virgádan ođđa direktevrra maŋŋel go dálá direktevra, Mona Solbakk, luohpá.
Maŋŋel go NRK sámi direktevra, Mona Solbakk, dieđihii ođđajagimánus dán jagi ahte son luohpá direktevran, de lea bargun leamašan ohcat ođđa direktevrra. Go ohcanáigi dievai, de ii lean NRK sápmi vel gearggus almmuhit ohcciid. Sii ledje baicca guhkiidan ohcanáigemeari njukčamánu 14. beaivái dán jagi.
Go ohcanáigemearri dievai, de ledje guhtta ohcci ohcan virgái. Guokte dain eai háliidan almmuhit namáset ohcama oktavuođas.
Dál lea bargu loahpahuvvon ja ođđa direktevra sajis.
Livččii guokte jagi vel
NRK dieđiha ahte 42-jahkásaš guovdageaidnulaš, Johan Ailo Matthias Kalstad gii dál lea direktevra Sámi allaskuvllas, lea virgáduvvon NRK Sámi direktevran. Son luohpá allaskuvlla direktevra virggis ja álgá ođđa direktevravirgái Nrk Sápmái.
Direktevravirgi Sámi allaskuvllas lea jahkemearrevirgi, ja Kalstadas livččii guokte jagi vel leamašan dan jahkemearrevirggis.
Johan Ailo Kalstadii ii leat mediamáilmmis amas, go sus lea juste Sámi allaskuvllas journalisttaoahppu, ja son lei maid ovttagaskka NRK sámis resursahoavda. Dasa lassin lea sus siviilaekonoma masteroahppu maid son válddii Norgga gávpeallaskuvllas (Norges Handelshøgskole). Sus lea nanu bargoduogáš maid, dasa lassin go son lea leamašan Sámi allaskuvlla direktevra. Son lea maid leamašan gulahallanráđđeaddi fitnodagas Geelmuyden Kiese AS. Dasa lassin lea leamašan senioraráđđeaddi Statkraft strategiijaossodagas.
Ávvir ii lihkostuvvan oažžut Nrk hoavdda Thor Gjermund Eriksena, dahje Nrk Sámi ođđa direktevrra, Johan Ailo Matthias Kalstad, ságaide kommenteret.
