Jan Rune Måsø šaddá ođas- ja áigeguovdilredaktevrra ja Pål Hivand ges almmuhanredaktevrra.
Jan Rune Måsø šaddá ođas- ja áigeguovdilredaktevrra ja Pål Hivand ges almmuhanredaktevrra.
«NRK ja NRK Sámi bealis lean hui movttet go oažžut Måsø ja Hivanda NRK Sámi redaktevrrajovkui. Ovttas sudnuin lean sihkkar ahte mii nákcet loktet sámi áššiid oidnosii ja bohciidahttit servodatdigaštallamiid», nu lohká NRK Sámi hoavda, Mona Solbakk preassadieđáhusas.
Máhccá Sápmái
Ođas- ja áigeguovdilvuođaredaktevrran galgá Måsø (39) jođihit doaimmahaga gos leat badjel 40 bargi.
«Mun lean hui movttet go Måsø dál máhccá fas Sápmái. Su nanu journalistamáhtuin nanusmahttit NRK Sámi áigumuša loktet beroštumi sámi áššiide sihke Sámis ja Norgga našunála dásis ge», čállá Solbakk.
Nanu duogáš
Måsø lea Deanus eret. Maŋemuš logi jagi lea son orron Oslos.
Son lea ollu jagiid bargan riikka mediain, nugo NRK Nyheter, TV2 ja VG.
Måsø lea ovdal ge bargan NRK Sámis. Maŋemuš áiggiid lea son bargan Forbrukerinspektørene-prográmmas NRK:s.
Jan Rune Måsø álgá redaktevrravirgái čakčamánu 1. beaivvi.
Govven: NRK
Luohpá sámedikkis
Girkonjárgalaš Pål Hivand (49) álgá almmuhanredaktevran. Su ovddasvástádus lea erenoamážit ovdánahttit NRK Sámi almmuheami sihke otná ja ođđa medialávddiide.
«Hivandin fitnet mii erenoamáš analyhtalaš ja strategalaš redaktevrra geas lea buorre digitála áddejupmi ja čehppodat. Son áŋgiruššá loktet ja rahpat sámi servodatdigaštallama. Justa dan maid dárbbašat dál», čállá Solbakk.
Hivand bargá dál Sámedikki gulahallanráđđeaddin, gos maiddái leamaš gulahallanhoavda. Son lea journalistan bargan máŋgga medias, nugo Finnmark Dagblad, Sør-Varanger avis ja NRK Sámis.
Hivand álgá almmuhanredaktevrravirgái skábmamánu 1. beaivve.
