Ihkku gahčai poastagirdi go lei girdime Oslos davás Romsii. Guokte olbmo ledje girdis ja navdoba duššan.
Ihkku gahčai poastagirdi go lei girdime Oslos davás Romsii. Guokte olbmo ledje girdis ja navdoba duššan.
Poastagirdi, mii jávkkai rádáris mannan ija, lei doalvume poastagálvvu Posten Norge ovddas davás Romsii. Girdis bođii heahtediehtu Bådådjo girditordnii sullii diibmu 00:30 ja sihke Norgga ja Ruoŧa gádjun- ja ohcanjoavkkut ožžo dieđu. Báiki gosa girdi lea gahččan gávdnui diibmu 03:10 Ruoŧa beale ráji, Áhkkájávrri lahkosis.
Maŋŋel go gávdnui gahččan girdi mii lea buot mollanan, de biddjo dutkanášši viidáset Ruoŧa politiijaide, čállá NSD.
Guokte olbmo leigga girdis
Girdis leigga guokte olbmo. Girdikapteaidna (42) ja vuosttašoffiseara (34). Soai leigga girdime poastagálvvuid Gardermoenis Romsii, go girdi gahčai.
Girdi gullá West-Atlantic girdifitnodahkii, ja sii dollet preassakonferánssa diibmu 11:is Gothenburgas Ruoŧas, čállá West-Atlantic preassadieđáhusas.
Dollet oktavuođa
Posten Norge lea olles ija doaladan oktavuođa West Atlantic fitnodagain mii fievrrida poastta Norggas. Girdis lei A-poasta, unnit páhkat ja ekspresspáhkat mat galge davás Davvi-Norgii.
West Atlantic ovttas Posten Norgiin eai sádde poastagirdi mii galggai Svalbardii odne. Dán čállá Posten Norge preassadieđáhusas.
Jáhkket olbmoguoktá duššan
Gádjunjođiheaddji Anders Lennholm muitala NRK:i ahte poastagirdi, mii gahčai Norgga ráji lahka, gahčai hui fáhkkestaga, ja son oaivvilda ahte ii leat vejolaš beassat heakkas go nie bahuid gahččá girdi.
– Vuoruhit gádjut heakkaid
– Mii leat sádden min bargiid dohko ja áigut maid oaidnit movt lihkohisvuođabáikkis lea. Ii leat vel boahtán sis diehtu ruovttoluotta midjiide, muitala diehtojuohkki Maria Jakobsson Norrbotten politiijas TT ođasgáldui, ja lasiha – Mii vuoruhit gádjut heakkaid.
Politiijat eai dieđe leat go dan báikkis eará olbmot. Dálki guovllus maid maŋida dutkama.
– Báikkis lea čoaskkis ja vehá dálki, muitala Jakobsson TT:i.
Girdi mii gahčai lea ráhkaduvvon 1993:s.
