Gávcci jagis lea idjahaddi lassánan dušše 30 ruvnnuin.
Gávcci jagis lea idjahaddi lassánan dušše 30 ruvnnuin.
Horwath HTL iskkadeapmi čájeha ahte olgoriikkalaččat idjadit dávjjit Norgga hoteallain, muhto haddi ii goarkŋo áktánasas.
Maŋimuš gávcci jagis ii leat idjahaddi lassánan eanet go 30 ruvnnu, čállá NTB.
Hoteallat rahčet
2008 rájes leat eará gálvvut divron 20 proseanttain, muhto hoteallalanjaid láigu lea illá lihkastan.
Ođđa hoteallat ja váttis gilvu sáhttá čilgehussan manin lea beanta hálbi idjadit Norgga hoteallain.
– Sii geat eai čuovo mielde jáhkket ahte hoteallasuorggis manná bures, muhto olu hoteallat rahčet eanet go ovdal, lohká guorahalli Per-Erik Winther Dagens Næringslivii.
Juohke goalmmát hotealla ii dine
Dássážii dán jagi leat olgoriikkalaš hoteallaguossit lassánan 11 proseanttain.
2008 rájes 2015 rádjai ges lassánii juohke hoteallalanja dienas 0,2 proseanttain, čájehit statistihkalaš guovddášdoaimmahaga logut.
– Norgga hoteallain lea eanemus buvttadanmunni davviriikkain. Dál šaddá juohke bargi hoidet duppal geardde eanet hoteallalanjaid go logi jagi áigi. Dát dagaha ahte lea hálbi Norgga hoteallain idjadit ja ahte hoteallat nákcejit gilvalit. Seammás lea nu ahte juohke goalmmát hotealla ii dine ruđaid, dohká NHO mátkeealáhusa direktevra Kristin Krohn Devold.
