Norgga álbmot lea jienastan, ja dál leat logi finalistta geat sáhttet vuoitit gilvvu «Norgga buoremus fitnodatnamma 2017». Davvi-Norggas leat olles golbma fitnodaga ain mielde gilvvus.
Dá lea njealját jahki go Gule Sider lágida gilvvu «Norgga buoremus fitnodatnamma». 300 fitnodaga ledje nominerejuvvon gilvui ja 20 fitnodaga besse viidásit.
Dán 20 fitnodagas lea álbmot beassan jienastit guhtes lea buoremus fitnodatnamma.
Eai gosse ovdal leat nu oallugat jienastan go dán jagi.
Olles 13 000 olbmo jienastedje neahttasiiddus www.bestefirmanavn.no, ja dát leat beali eambbo jienasteaddjit go diibmá.
Dál galgá jury mearridit guhte dán logi finalisttas vuoitá.
Čalmmustahttit unnit fitnodagaid
Gule Sider čállá ulbmil dáinna gilvvuin lea čalmmustahttit ja loktet unnit fitnodagaid ja báikkálaš ealáhusaid miehtá Norgga.
– Lea nu ihána somá oaidnit go nu oallugat serve gilvui ja beroštedje dán gilvvus. Mii oaidnit Norggas leat máŋggat somás fitnodatnamat dain unnit fitnodagain, ja mii oaidnit maid movt olbmot áŋgiruššet čalmmustahttit sin guovllu fitnodagaid, muitala Gule Sider kommunikašuvdnahoavda Renate Morken.
Somás namma vuovdá
– Gilvvus mii ohcat somás ja hutkás fitnodatnamaid mat čilgejit maid fitnodat buvttada, ja mii buktá positiiva assosiašuvnnaid dahje fitnodatnama man lea álki muitit. Somas ja álkes fitnodatnamat sáhttet veahkkin vuovdalit fitnodaga ja dan maid fitnodat ovddida, muitala gilvvuid juryovdaolmmoš Merethe Nyvold Johannessen.
– Mii leat ožžon nu somás ja hearvás evttohusaid, ja dál mii galgat valljet guhte fitnodat vuoitá gilvvu. Lea hui váttis mearridit guhte fitnodat vuoitá, loahpaha Johannessen.
Dá leat gilvvu «Norgga buoremus fitnodatnamma 2017» finalistat:
- Kåre på kaia Café – Vuotnasiida, Romsa (Sjøvegan, Troms)
- Tana Musikk & Maskin Dansemusikk og gravearbeid – Deatnu, Finnmárku (Tana, Finnmark)
- Hair e vi Frisør – Florø, Sogn ja Fjordane
- Lugumstugu Blomster/Interiør/Klær – Vågå, Opplánda
- Smør og kjærlighet Café – Várggát, Finnmárku (Vardø, Finnmark)
- Bare rør AS Rørlegger – Skien, Telemárku
- Veldig sulten Catering – Kråkerøy, Østfold
- Han med traktoren AS Gravearbeid/Brøyting/Transport – Kristiansand, Aust-Agder
- Sans & Samling Café/Kunstgalleri – Leknes, Nordlánda
- Siste stikk Tattoo og piercing – Kristiansund, Møre ja Romsdal
