Pandemiija ii leat dagahan ahte norgalaččaid eallinkvalitehta lea olus njiedjan.
Njukčamánu 20. beaivvi lei máilmmi lihkkobeaivi. ON ásahii beaivvi 2012:s čalmmustahttit man dehálaš olbmuide lea eallinkvalitehta ja dovdat lihku.
– Dál dovdet oallugat mis ahte pandemiija lea čuohcan eallinkvalitehtii ja váillahat eallima mii lei ovdal pandemiija. Sihke lihkkoraporta ja Álbmotdearvvašvuođainstituhta dutkamat čájehit unnán njiedjama gaskamearálaš ilolašvuođas Norgga álbmogis. Boahtteáigásaš optimisma lea aŋkke ain allat ja ilolašvuohta lea oalle stabiila, muhto dáidá molsašuvvat njoammunsuddjendoaibmabijuid dihte, dadjá Álbmotdearvvašvuođa seniordutki, Ragnhild Bang Nes.
Dán jagi lihkkoraporttas čájehuvvo ahte norgalaččat leat guđadin lihkolaččamus olbmot olles máilmmis. Suopma lea dán jagi vuosttaš sajis, nu go diibmá ge lei. Vuolimužžan raporttas leat Rwanda, Zimbabwe ja Afghanistan.
