– Ráđđehus áigu doarjut giellajagi markerema ja searvá doaibmaoasálažžan, lohká gielda- ja ođasmahttinministtar Monica Mæland.
ON váldočoahkkimis mearriduvvui ahte 2019:s galgá leat eamiálbmotgielaid internationála jahki.
– Ráđđehus doarju ON barggu sierra eamiálbmotgielaid jagiin. Giella lea dehálaš oassi olbmuid eallimis, ja dát eamiálbmogiid historjá, kultuvra ja identitehta čalmmustahtto, lohká gielda- ja ođasmahttinministtar Monica Mæland ráđđehusa preassadieđáhusas.
Keskitalo mielde jođiheame
Lea UNESCO mas lea ovddasvástádus giellajagis, ja sierra jođihanjoavku lea álggahuvvon mas stáhtat, eamiálbmogiid ovddasteaddjit ja Bistevaš foruma miellahtut leat.
Mæland lohká illun go sámediggepresideanta Aili Keskitalo lea mielde jođihanjoavkkus ja sáhttá mielde váikkuhit loktet árktalaš eamiálbmotgielaid riikkaidgaskasaččat.
Sámi gielat dárbbašuvvojit oidnot
Ráđđehus lea juolludan 1,1 miljovnna ruvnno lassáneami Sámediggái čađahit barggu riikkaidgaskasaš eamiálbmotgielaid oktavuođas.
Sámediggi pláne lágidit iešguđetlágan doaimmaid, ja ráđđehus lea positiiva leat mielde muhtin dain doaimmaid lágideamis.
– Giellajahki lea motivašuvdnan midjiide go áigut nannet eamiálbmogiid gielaid. Ráđđehusas lea mihttu ahte eambbogat galget váldit atnui sámi gielaid, muhto lea dárbu ahte sámi gielat oidnojit servvodagas, lohká Mæland.
