Kárášjohkalaš ja IL Nordlys valáštallansearvvi njuikejeaddji Ole Mathis Nedrejord lea váldon mielde geahččalannjuikejeaddjin Raw Air sattáhallanfinálii Vikersundas.
Kárášjohkalaš ja IL Nordlys valáštallansearvvi njuikejeaddji Ole Mathis Nedrejord lea váldon mielde geahččalannjuikejeaddjin Raw Air sattáhallanfinálii Vikersundas.
IL Nordlys valáštallansearvvi njuikejeaddji Ole Mathis Nedrejord lea okta daid guoktelohkásis gii galgá njuiket geahččalannjuikemiid boahttevahkkoloahpas Vikersund luohkás.
Eanaš njuikejeddjiide lea niehku beassat njuiket stuorra luohkás, ja vanahit njuikema nu guhkás bodnái go vejolaš.
Vikersund lea máilmmi stuorámus luohkká gos Anders Fannemelas lea máilmmi olahus ja dat lea 251,5 mehtera.
Issoras somá
Nedrejord leamaš geahččalannjuikejeaddjin guktii ovdal. Diibmá olahii son dan magihkalaš rájá, 200 mehtera, muhto gahčai.
Sus lea persovnnalaš olahus 186 mehtera dán luohkás.
– Sattáhallan lea somá! Lei somá ja gelddolaš beassat mielde, diibmá njuikejin measta bodnái luohká, lei issoras somá, dadjá Ole Mathis Nedrejord.
Dehálaš bargu
Geahččalannjuikejeddjiin lea dehálaš bargu vai jury oaidná ovddalgihtii makkár dilálašvuohta lea njuikenleavttus, makkár leavttu galgá bidjat ja mo luohkás lea njuiket.
– Duostilis geahččalannjuikejeddjiid haga eat livčče sáhttit lágidit sattáhallannjuikema, sin bargu lea dehálaš juryi, dadjá Ole Gunnar Fidjestøl, gii lea gilvvuidjođiheaddji ja ovddeš máilmmimeašttir sattáhallannjuikemis.
Geahččalannjuikejeaddjit álget njuiket luohkás duorastaga njukčamánu 16. beaivvi diibmu 15.30.
