Biilalihkohisvuohta Geađgejávrri buohta, gos njealjis leat sáddejuvvon Sea King mielde buohccevissui.
Odne iđit dieđihii suopmelaš biilavuoddji ahte lea nubbi biila čálistan luottas eret ja doarrás Geađgejávrri bokte, lahka duollu geađgeluobbalis, birrasiid njealje miilla Guovdageainnu lulábealde.
Visot heahteetáhtat sáddejuvvojedje báikái, dasa lassin vel suoma ambulánsa.
Biillas ledje njeallje olbmo ja buohkat leat sáddejuvvon buohccevissui.
Álggos válde buohccebiillat dan njealljása Guovdageidnui, gosa ledje guokte helikoptera boahtán.
Njeallje dievddu, gaskal 30 ja 40-jahkásáččat leat sáddejuvvon Hámmárfestii ja Tromsii.
Finnmárkku politijaguovllu operašuvdnajođiheaddji, Tarjei Leinan Mathiesen, muitala ahte buot njealjis leat Áltái gullevaččat.
– Mis ii leat diehtu man bahuid leat roasmmahuvvan, muitala son.
– Mii leat váldán varraiskosiid biilavuoddjis ja lea duođaštuvvon son lea áibbas čielggus. Mii eat dieđe manin lea geavvan lihkohisvuohta, muhto mii dutkat ášši dábálaččat. Biilavuoddjis maid eat leat duoguštan biilakoartta go ii oro vuođđu dan dahkat, muitala Mathiesen.
