Audioland musihkkafitnodat lea bargagoahtán oažžut sámi musihka viidáset máilbmái ja čatná oktavuođaid Amerihká musihkkamárkaniin.
Audioland musihkkafitnodat lea bargagoahtán oažžut sámi musihka viidáset máilbmái ja čatná oktavuođaid Amerihká musihkkamárkaniin.
Audioland lea áidna Davvi-Norgga skearrofitnodagain mii lea fitnan suorgedeaivvadeamis ja lonohallamis New Yorkas ovttas njealji eará Norgga skearrofitnodagain.
Norggas vulge Music Norway delegašuvdna konferánsii «A2IM Indie Week 2016» mannan vahkku man The American Association of Independent Music lágidii.
Konferánssas, mii lei New Yorkas, lei máhttolokten ja oahpásmuvvan vai oktavuođaid sáhttá čatnat.
– Audioland lea máŋga jagi plánen olahišgoahtit dobbelii sámi musihkain, ja lea lunddolaš dustet go dakkár vejolašvuohta boahtá, muitala Audioland beaivválaš jođiheaddji Olga Solyanik Ávvirii.
Internašunála márkana guvlui
Mátkki váldomihttu lei loktet máhtu liseanssaid ja digitála márkanastinbálvalusaid dáfus.
– Dát lea oassin Audioland barggus internašunála márkana ektui. Mii leat bargan dáinna máŋga jagi ja geavahan ollu návccaid dán bargui. Lea dušše álgu viiddis barggus mii gáibida ollu fokusa, gamus ferte dovdat buari barggu ja oktavuođaid dikšuma, muitala Solyanik.
Beroštupmi Amerihkás
Badjel 800 delegáhta ledje boahtán New Yorkii musihkkakonferánsii A2IM Indie Week, gos ledje fáttát movt lisensieret musihka ja márkanastima birra.
– Lei buorre beroštupmi konferánssas Audiolandii ja min buktagiidda. Dan dihte áigut čađahit márkanastindoaimmaid ja PR-doaimmaid Amerihká musihkkabirrasii, muitala Solyanik, ja lasiha ahte mediai áigot almmuhit eanet go šiehtadusat dahkkojit.
Audioland lea iešheanálaš skearrofitnodat, skearromearkabálvalus ja artistajođihanbálvalus Davvi-Norggas, ja barget ođđaáigásaš sámi musihkain, ovttasbarget lávllačálliiguin, artisttaiguin ja musihkkabuvttadeddjiiguin miehtá Sámi.
– Maŋemus dálvvi lea Audioland ovdánahttán ja buoridan dási musihkkastudios. Ođđajagis galget máŋga ođđa musihkkaprošeavtta gárvánit, muitala Solyanik Ávvirii.
