NBR gáibidit boazodoallošiehtadusa bokte miljovdnasaš lassánemiid alcceset. Okta dain váldoákkain lea go mátkkoštit jahkásaččat 1,9 miljovnna ovddas
Norgga Boazosápmelaččaid Riikkasearvi oažžu maid alcceset doarjaga boazodoallošiehtadusa bokte.
Diibmá oaččui NBR 6,1 miljovnna ruvnno doaimmahit iežaset bargguid. Dál leat sii gáibidan stáhtas veaháš lassáneami.
Sii gáibidit stáhta lasiha doarjaga 1,9 miljovnna ruvnnuin, mii lea 24 proseantta lassáneapmi.
Haddegoargŋun
NBR gáibádusas boahtá ovdan ahte sii gáibidit stáhta doarjut sin measta 8 miljovnna ruvnnuin boahtte šiehtadusas.
Dan sii ákkastallet dainna ahte NBR doarjja ii leat regulerejuvvon haddegoargŋuma ektui obanassii ge.
Sii čállet ahte NBR oaččui 5,9 miljovnna ruvnno doarjaga 2005:s. Jus dan regulere haddegoargŋuma ektui, de lea 2005 5,9 miljovnna ruvdno dálá árvvu mielde 7,6 miljovnna ruvnno.
Mátkkoštit eambbo
NBR jođiheaddji, Ellinor Marita Jåma maid ákkasta ahte sii mátkkoštit badjel beali eambbo dál go ovdal.
Son čujuha dasa ahte 2005:s ledje NBR mátkegolut 830 000 ruvnno ovddas. 2015:s ledje dát golut lassánan issorasat, namalassii 1,9 miljovnna ruvnno ovddas.
– Mii fertet leat dain báikkiin gos mearrádusat dahkkojit, ja maid čuovvut čoahkkimiid, vai min jietna gullo, ja vai min haga ii mearriduvvo mihkke mii midjiide čuohcá, lohká Jåma, ja čujuha visot sisabahkkemiidda mat čuhcet boazodollui.
