Finnmarksløpet oasseváldit vásihit garra dálkkiid.
FL beanagilvvuid jođihangoddi lea árabut jo cealkán ahte bissehit gilvvuid jus dálkkáska menddo sakka. Dálkedieđáhus leage almmuhan garra dálkki go vuoddjit galget vuoddját maŋimuš mátkái Kárášjogas Áltái.
Bođii dálki
Duorastatiđida lei goalki ja fiinna dálki, muhto maŋŋelaš álggii bosodit oalle nannosit go vuoddjit lahkonišgohte Leavvajoga. Vuosttažin ollii diimmá vuoiti Sigrid Ekran Leavvajohkii beal logis ja lei badjelaš ovttas ain vuoiŋŋasteamen.
Diimmu maŋŋel Ekrana ollii Kjell Brennodden ja hárjánan beanavuoddji lei šaddan bisánit badjel diibmobeali biekka geažil. Su eamit Solbjørg Sunde, gii lea maiddái okta su vehkiin, muitalii NRK njuolggosáddagis Leavvajogas gaskabeaivvi áigge, ahte su isit lei ballán dálkki geažil, go ii nagodan šat stivret reaga ja šattai beare orustit garra biekka geažil. Su eamit logai maiddái sin oaidnit GPS-rusttegis ahte máŋga vuoddji leat bisánan seamma báikkis gos su isit bártidii.
Bártidan
Goalmmádin joavddai Ralph Johannessen, gii maiddái lei vásihan bártti.
– Lei joga alde ovtta sajis gos ii lea muohta jieŋa alde. De bosádii fáhkka ja biegga bálkestii reaga 20 mehtera ovdal go bisánii muohtaskálvái ja mun bávččagahtten iežan. Jáhkán ahte okta erttetdákti doddjui, muitalii Johannessen Finnmarksløpet ođđasiidda.
