NSR presideantaevttohas logai alddis našunáladovddu go Metodistagirku olggobealde čuoččui Sámi álbmotbeaivvi 100-jagi ávvudeami oktavuođas.
Guovvamánu 6. beaivvi 2017:s lea 100-jagi áigi go vuosttaš sámi konferánsa dollui Troandimis, Davvi-Trøndelágas.
Dat lea ge duogáš manin guovvamánu 6. beaivvi ávvuduvvo Sámi álbmotbeaivin.
Dan beaivvi dollui čalmmustahttin olggobealde dan girku gos vuosttaš sámekonferánsa lágiduvvui 100 jagi áigi. Girku lusa ledje čoagganan issoras olu olbmot, juohke sámeguovllu gávttehasat ledje doppe.
Govven: Nils Johan Vars
Measta njuorasmuvai
Norgga Sámiid Riikkasearvvi presideantaevttohas, gii maiddái lea ávvudeami bargojoavkkus, Aili Keskitalo, lei diehttelasat čalmmustahttimis, ja son muitala alddis erenoamáš dovddu leamaš dan botta.
– Juo, mun measta njuorasmuvven. Mus bođii dakkár dovdu juste dalle, ja dat lei várra dat našunáladovdu mus, muitala son.
Keskitalo lei moddjái dego beaivváš ja dovdui maid jearahallamis ahte sus leat garra dovddut juste odne.
Govven: Nils Johan Vars
Buorre dovdu
Norgga stáhtaministtar Erna Solberg sávai Ávvira lohkkiide lihku beivviin, ja logai alddis hui buori dovddu leat Troandimis juste dál.
– Dat lei historjjálaš báiki gos leimmet, lei hui buorre dovdu mus dan botta go čalmmustuvvui 100 jagi ávvudeapmi, juste dan báikkis gos dat vuosttaš čoahkkin lei 1917:s, logai son.
Solberg gesii maid ovdan Sámi ofelaččaid, geaiguin son lea hui rámis go dat ortnet ásahuvvui dalle go son lei sámeministtar.
– Lea okta dain diŋggain mainna lean hui rámis go dat ortnet lea ásahuvvon, lohká son.
Olu dagakeahtas
Suohkan- ja ođasmahttinministtar Jan Tore Sanner logai sámiin olu ovdánan dán 100 jagis.
– Lei hui erenoamáš leat dáppe juste dál ja dás čuožžut, ja čalmmustahttit sin geat dás ledje 100 jagi áigi vuosttaš sámekonferánssas, lohká son.
Sanner mieđiha ahte leat vuos guhkkin eret olihit dohko gosa háliidit.
– Olu lea vuos dagakeahtas, muhto mii johtit rivttes guvlui, dakkár dovdu lea mus, deattuha son.
Govven: Nils Johan Vars
Sámekultuvra oassi gávpogis
Troandima suohkana sátnejođiheaddji, Rita Ottervik, lei coggan ulloliinni badjelii Sámi álbmotbeaivvi.
– Juo, dat lea čalmmustahttin dihte ahte Lulli-Sámi álbmot lea oassin min gávpogis, ja dainna lean mun hui rámis. Odne mun moddján bealjis bealljái, ja nu issoras fiinna dálki vel. Dákkár dálkkiin eat gal leat mii hárjánan Troandimis dán muttos áigge, lohká son
Troandimis jotket iešguđetlágan doalut ja čoahkkimat olles vahku.
