Háliida jorgalahttit duopmostuoluid ovttastahttima:
Sámediggeráđđi oaidná vejolažžan jorgalahttit maŋŋel stuoradiggeválggaid Finnmárkku duopmostuoluid ovttastahttima.
Sámediggeráđđi lea ovddidan ášši sámiid riektesihkkarvuođas Sámedikki dievasčoahkkimii mii lea njukčamánu. Ášši fáddá lea Sámedikki sajádat riekteproseassain ja sámi riekteveahkkedárbbu ektui. Ráđđi lea maid dieđihan eanet dievasčoahkkináššiid čuovvoleapmin riektesihkkarvuođa ektui ja ovtta áššis lea fáddán sámi sisdoallu duopmostuoluin.
– Mun lean oalle duhtameahttun Stuorradikki meannudemiin duopmostuollostruktuvrra rievdadusaid oktavuođas, mas boađusin šattai Sis-Finnmárkku ja Nuorta-Finnmárkku diggegottiid ovttastahttin ja ahte Porsáŋggu gielda sirdojuvvui Sis-Finnmárkku diggegottis Oarje-Finnmárkku diggegoddái, muitala NSR presideanttaevttohas Silje Karine Muotka preassadieđáhusas.
– Ovttastahttin jorgalahttojuvvo
Muotka háliida máhcahit ovddeš vuogádaga go ođđa Stuorradiggi válljejuvvo čakčat.
– Jus dilli Stuorradikkis maŋŋel válggaid dahká dan vejolažžan de háliidan bargat dan ovdii ahte Sis-Finnmárkku ja Nuorta-Finnmárkku diggegottiid ovttastahttin jorgalahttojuvvo, ja vel ahte Porsáŋggu gielda máhcahuvvo Sis-Finnmárkku diggegoddái, dadjá Muotka.
– Galgá leat resursaduopmostuollu sámi áššiin
Beroškeahttá ovddeš vuogádaga máhcaheamis de háliida NSR bargat dan ovdii ahte diggegoddi Deanus ovdánahttojuvvo sámi resursaduopmostuollun.
– Mii dáhttut aŋkke bargat dan ovdii ahte diggegoddi Deanus galgá leat resursaduopmostuollu sámi áššiin. Mii dáhttut maid rievdadit gustojeaddji diggenjuolggadusaid nu ahte sámi áššit eará riektebiriin sirdojuvvojit Sis-Finnmárkku diggegoddái. Dát ii mearkkaš gal ahte bealálaččat fertejit mátkkoštit Detnui, muhto ahte diggegoddi sáhttá meannudit áššiid olles riikkas, loahpaha Muotka.
