– Mu vuokkas dat ii beroš

Luossabivddu álgoáigodaga Deanu čázádaga almmolaš logut čájehit ahte Deanu bealde goddo eambbo go Kárášjogas.  Kárášjoga luossabivdi ii leat vuos heađástuvvan.

Kárášjohkalaš Thomas Guttorm lohká liikot Beskenjárgga šalddi buohta oaggut, mii lea moadde miilla olggobealde Kárášjoga márkana. Muhto ii loga vuos gullan guoli.
– Menddo árrat soiten álgán dán jagi bivdit. Miessemánu 23. beaivvi lei vuosttaš beaivi go dollestin joh’gáddái, muhto in leat vuos gullan guoli, muitala luossabivdi Thomas Guttorm.

Dábálaš árragease
Deanučázádaga Guolástanhálddahusas muitalit ahte dat lea áibbas dábálaš go Deanu bealde goddet eambbo go Kárášjoga bealde.
– Dat lea áibbas lunddolaš árragease. Luossabivdu lea nu ahte árragease luossa vuodjá. Danin ge dan muttos áiggi Deanu bealde goddojit eambbo go Kárášjoga bealde Deanu čázádagas, muitala Deanučázádaga Guolástanhálddahusa direktevra Hans-Erik Varsi.

Golgadeapmi ja fierbmi
Deanučázádaga Guolástanhálddahus, mii vuođđuduvvui njukčamánu jagis 2011:s dainna ulbmilin ahte hálddašit Deanočázádaga Norgga bealde. Juohke jagi, das rájes go vuođđuduvvui, leat dieđut registrerejuvvon mas čuožžu gos, goas, mainna ja gii lei goddán luosa.  Dárkileappot dieđut gárvvistuvvojit čakčamánnui go luossabivdoáigodat nohká.
– Dieđut mat leat neahtas juste dál, eai leat áibbas dárkilat. Das ii boađe ovdan ahte leago firpmiin dahje golgademiin goddon luossa. Muhto dakko gokko tabeallas čuožžu “eará”, mearkkaša dan ahte luossa lei goddon fierpmis dahje golgadeamis.  Ja dat lea ge dan muttos áigge áibbas dábálaš.
 

(ášši joatkká tabeala vuolabealde)

Dieđut vižžon geassemánu 9. beaivvi. 

Gáldu: Deanučázádaga guolastanhálddahus.

Buoret go diibmá
Deanučázádaga Guolástanhálddahusas (DG) čilgejit ahte dát jahki, diimmá jagi ektui, lea earálágan dálkki dáfus. Diibmá vulggii jiekŋa guokte vahku maŋŋelat go dán luossajagis. Maiddái dulvi váikkuhii.  DG diimmá raporttas boahtá ovdan ahte luossabivddu vuosttaš guovtti vahkus ledje goddon 180 luosa.
– Dán jagi geasui ollu árabut go dábálaččat. Das leat váikkuhusat oaggumii. Árrat goddet eanas luosaid Deanus golgadeamis (15.6. rádjái). Muhtun golgadanguovlluin lea ovdamunni go lea nu coagis go dál, eará guovlluin ferte fas eambbo dulvvis, jus galgá golgadit sáhttit.
 
– Mu vuokkas luossa ii beroš
Kárášjohkalaš Thomas Guttorm geas leat áigumušat luosaid oaggut miehtá dán geasi, nu mo eará gesiid ge lea dahkan.
– Juste dál goit mu vuokkas luossa ii beroš. Ii dat beroštan ge nu olu diibmá ge, muhto ovddit jagi gal godden 8-9 luosa. Sávvamis dan jagi oidno guolli. Deanus gullui oidnon jo olu luosat. Mun gal beare oakkun.