Duorastaga mearriduvvui ahte buot skuvllat Norggas giddejuvvojit guokte vahkku ovddas guvlui. Movt čovdet Kárášjoga ja Guovdageainnu vuođđoskuvllat dan dili?
Covid-19 dahje korona-dávdda geažil leat gidden buot skuvllaid ja mánáidgárddiid Norggas. Ávvir lea jearahallan movt Kárášjoga ja Guovdageainnu vuođđoskuvllat áigot bargat ovddas guvlui.
Kárášjoga vuođđoskuvla
– Mis lea fálaldat ohppiide geat vázzet 1. – 4. luohkká. Sidjiide ii šatta dábálaš oahpahus, muhto besset boahtit skuvlii dahje čuovvut astoáigefálaldaga skuvllas, muitala rektor Jan Gunnar Johansen.
Johansen muitala maid ahte sii sáddejit bargobihtáid mánáid- ja nuoraidskuvlla ohppiide vai besset ruovttus bargat.
– Min oahpaheddjiin lea leamaš oktavuohta váhnemiiguin dan ektui háliidat go váldit vuostá fálaldaga sáddet mánáid skuvlii dahje skuvlla astoáigefálaldahkii. Dieđusge ii leat dat optimála dilli, muhto juoga ferte dahkkot mánáid ja váhnemiid ektui, muitala Johansen.
Johansen muitala maid ahte sii leat guorahallame movt livččii jus šaddá neahttaoahpahus.
– Dieđusge lea gáržžádus man olu neahttaoahpahusa sáhttá ovdamearkka dihte okta mánná gii vázzá vuosttaš luohkás oažžut, go lea akto ruovttus, nuvt mii fertet heivehit juohke mánnái movt de nu heive, muitala Johansen.
Guovdageainnu vuođđoskuvlla
Guovdageainnu vuođđoskuvlla rektor Ella Eira lea sádden dieđu buot váhnemiidda movt ovddas guvlui áigot bargat vai mánát eai masse oahpu.
– Buot gulahallan šiehtaduvvo gulahallanoahpaheddjiin, ja gulahallan lea vuosttažettiin Vismma bokte. Jus leat jearaldagat neahttaoahpahusa birra ja vahkkoplánaid ektui, de ferte gulahallat gulahallanoahpaheddjiin, čállá Eira.
Eira čállá maid ahte oahppit geat bohtet skuvlii dahje SAÁO:i, FHI ávžžuhusaid mielde, galget dieđihit rektorii dahje oahpahusdárkkisteaddjái Vismma dahje e-boastta bokte. Sidjiide addo oahpahus vahkkoplána mielde ja bearráigeahčču sierra plána mielde, man skuvla lea ráhkadeamen.
– Gulahallanoahpaheaddjit ráhkadit vahkkoplána maid sáddejit ruoktot. Oahpahusas vuoruhuvvojit lohkan, čállin ja rehkenastin. Oahppit geat boahtit skuvlii dahje SAÁO:i, FHI ávžžuhusaid mielde, dieđihit rektorii dahje oahpahusdárkkisteaddjái Vismma dahje e-boastta bokte. Sidjiide addo oahpahus vahkkoplána mielde ja bearráigeahčču sierra plána mielde, man mii leat ráhkadeamen. Neahttaoahpahahus addo teams bokte, gaskadási ohppiide ja smávvaskuvlla dási ohppiide, sidjiide geat hálddašit dan. Oahpaheaddjit leat maiddái oahpahallame geavahit teamsa ja ožžot bagadallama dás, čalla Eira.
FHI ÁVŽŽUHUSAT:
Mánáidgárdejođiheaddjit ja mánáidskuvlla rektorat fertejit fuolahit fálaldagaid mánáide geain leat váhnemat/ovddasteaddjit dearvvašvuođa- ja fuolahusbálvalusas, fievrrádussuorggis dahje eará servodatdoaimmahusain. Dat guoská maid mánáide geain leat earenomáš dárbbut geaid eai sáhte áimmuhuššat go mánáidgárddit, skuvllat dahje eará beaivefálaldagat leat giddejuvvon.
