Čájet du ivnniid ja duohta iežat, danin go BlimE 2023 álggaheamis lea sadji buohkaide. Dat lea Anders Nils Gaup sáttasátni dán jagáš sámi BlimE lávllan.
Dán jagáš BlimE-lávlagiin lea ulbmil ahte juohkehaš ádde man dehálaččat sii leat. Buohkat sáhttet veahkehit iežaset láhkai dainna mainna sii leat ja máhttet, ja ovttas sáhttá oažžut eanemus ávkki. Buohkain lea mearkkašupmi ja sadji.
Dán jagáš sámi BlimE-artista lea Anders Nils Gaup, dahje Ánde Gaup. Son lea sámi profiila dovddus Juŋká YouTube-kanálas.
– Lávlla mearkkaša munnje ahte galgá duostat leat ieš ja ahte ii álo dárbbaš vuorjašuvvat maid earát smihttet du birra, mo leat olggosoaidnit dahje maid barggat. Go ii leat álo álki diehtit maid háliida bargat dahje mo galgá fallehit iežas nieguid. Ferte beare njuiket dasa ja geahččalit. Ii ge leat nu dehálaš maid earát smihttet mu biktasiid birra dahje mo mu vuovttat leat olggos oaidnit, nu guhká go ieš liikon dasa, dadjá Gaup preassadieđáhusas.
Ánde sávvá ahte «Moai girde» sáhttá addit muhtumii duostilvuođa čuovvut iežas bálgáid vaikko maid earát smihttet.
Ođas dán jagi lea ahte sámi BlimE-lávlagis lávlojuvvo golmma sámegielain seamma lávlagis. Sihke dárogiel BlimE-lávlaga «Sveve høyt» ja «Moai girde» beasat gullat otná rájes, geassemánu 16. beaivvi.
Ánde álggahii iežas karrieara NRK Sámis geassevikáran go lei 20 jagi boaris. Son barggai neahttareportarin ođasossodagas, muhto gávnnai jođánit geainnu guoimmuheapmái go lei mielde ráhkadeamen nuoraidradioprográmma Ihán. 2020:s oaččui barggu prográmmajođiheaddjin NRK Sámi Juŋká áŋgiruššamii, YouTube-kanála gaskal 12–14-jahkásaš gánddaide. Doppe stuorui humortaleanta sus ja son šattai jođánit ovdagovva váldoulbmiljovkui, muhto maiddái favorihtta sin gaskkas geas lea dárbu čaimmihit. Dál illuda Ánde čájehit dán jagáš sámi BlimE-lávlaga.
