Kárášjoga ovddeš sátnejođiheaddji Kjell Sæther illuda ja sávvá jo Somby ođđa ámmáhiin. Measta bealli jienain lea lohkkon ja Bargiidbellodagas lea ain 38,3 proseantta.
Kárášjoga ovddeš sátnejođiheaddji Kjell Sæther illuda ja sávvá jo Somby ođđa ámmáhiin. Measta bealli jienain lea lohkkon ja Bargiidbellodagas lea ain 38,3 proseantta.
Kjell Sæther luobai sátnejođiheaddji čulkkus Guovddášbellodaga dálá sátnejođiheaddjái Anne Toril Eriksen Baltoi njeallje jagi áigi, maŋŋel go čohkkái measta 24 jagi sátnejođiheaddji stuolus.
Sávvá jo lihku
Kárášjogas leat lohkkon 45,4 proseantta jienain olles jienastuslogus, muhto eai goassige jienas buohkat geat leat jienastuslogus.
Mannan válggas lei Kárášjogas jienastusoasálastin 66,2 proseantta, mii dáidá dán ge válggas sullii seamma.
Dat mearkkaša ahte Kárášjogas leat juo eanas jienat lohkkon, nu ahte orru oalle čielggas, ahte Bargiidbellodat šaddá stuorámus joavkun gielddastivrras.
Dan dáidá ge maid ieš boares sátnejođiheaddji, Kjell Sæther, juo vuohttán, go son sávai juo lihku Svein Atle Somby sátnejođiheaddji ámmáhiin.
Astá guldalit
Dál lea son hui movtta go bellodat orru oažžumin fámu ruovttoluotta ruovttugielddas.
– Odne gal orru mannamin máilmmi bures maŋŋel ovddalgihtii jienaid. Mun lean illudan otná beaivái ja livččii hui somá jus Svein beassá min sátnejođiheaddjin ja beassá fievrridit gieldda fas násttiide, illuda Sæther.
Ieš Svein Atle Somby gal viggá veahá bissehallat ovddeš sátnejođiheaddji ja bivdá su mášolaččat vuorddašit loahppabohtosiid.
– Svein Atle lea dego dakkár áddjá olbmuide, son astá guldalit ja moddjá čábbát, mojohallá Kjell Sæther.
Deavdá bures
Ávvir jearrá ahte nagoda Somby deavdit su stevveliid.
– Jo jo jo, sus leat stuorát biktasat ja gápmagat, nu ahte son gal deavdá bures, leaikkastallá Sæther.
Sæther diehtá ahte lea veahá árrat illudit, muhto lohká ahte lea dehálaš illudit oba dange botta go bistá.
Ii čiegadan maidige
Vaikko Kjell Sæther ii loga iežas šat nu aktiivvalažžan politihkas, de liikká háliida ahte su bellodat galggašii beassat fas stivrejupmái, go oaidná ahte gielddas ii leat mannan nu bures maŋŋel maŋimuš válggaid.
– Dat ii leat mannan justa nu go mun livččen háliidan. Dat sáhttá buoridit dili nuoraide ja boarrásiidda. Ja lohpiduvvon rabasvuohta gielddas maid lea jorgaluvvon justa nuppi guvlui ja politihkkárat orrot massán jáhkehahttivuođa. Go mun čohkkájin sátnejođiheaddjin, mun in čiegadan álbmogis in maidige, deattuha son.
Dá lea boađus, go leat measta beali jienain lohkkon:
