Sámedikkis ja Bådådjo suohkanis lea leamaš ovttasbargočoahkkin ja leat mearridan váldit mielde moadde ođđa čuoggá ovttasbargošiehtadussii.
Borgemánu čihččet beaivvi lei Sámedikkis ja Bådådjo suohkanis čoahkkin, ja čoahkkima fáddá lei ovttasbargošiehtadus.
Čoahkkimis árvvoštalle Bådådjo suohkana ja Sámedikki ovttasbargošiehtadusa.
Sámedikki ráđđemiellahttu Silje Karine Muotka muitala ahte dat lea juoga maid barget juohke jagi ovttas gávpotgielddaiguin.
Doppe sii árvvoštallet bohtosiid, čovdet čuolmmaid ja árvvoštallet maid sáhttet rievdadit jus lea dárbu.
Moadde ođđa čuoggá
Sámediggi ja suohkan leat ovttaoaivilis ahte šiehtadus lea dehálaš oassi go galgá čalmmustahttit ja ovddidit sámegiela Bådådjo suohkanis.
Muotka muitala ahte leat moadde čuolmma mat gusket sámegielohppui ja oahpaheddjide, muhto ledje maiddái eará čuoggát maid leat geahčadan ođđasit.
Sámediggi ja Bådådjo suohkan leat ovttaoaivilis váldit ođđa čuoggáid ovttasbargošiehtadussii ja Silje Katrine Muotka muitala ahte okta dain čuoggáin leat boarrásat.
– Sámedikkis lea vuorrasiidráđđi ja sii leat gáibidan ahte mii galgat geahččat vuorrasit olbmuid dili ja sin fálaldagaid.
Sámedikki ráđđemiellahttu Muotka muitala maid ahte son beasai leat mielde dingot sámegiel šiltta Bådådjos, ja dan son logai leat gelddolažžan.
– Giellaguovddáš doaibman bures
Muotka muitala ahte čoahkkimii ledje boahtán buot ossodatjođiheaddjit ja ahte sii válde Sámedikki ovddasteddjiid bures vuostá.
– Bådådjo giellaguovddáš, mii lea ođđa girjerádjosis, lea lágidan ollu doaimmaid, muitala Muotka.
– Giellaguovvdáš lea doaibman hirbmat bures ja leat ollu doaimmaid ovddidan.
Sámedikki ráđđemiellahttu Mikkel Eskil Mikkelsen lei maid mielde Nordlándda musihkkafeastavahkkus gos earret eará Ánnasuolu čuojahii. Márkanšiljus ledje ollu olbmot čoahkkanan.