Sámediggeráđđi evttoha mearrasámi vuoruhemiid go Sámedikki bušeahttaevttohus ovdanbiddjo skábmamánu 6. beaivvi. – Mii háliidit váikkuhit dan positiivvalaš ovdáneapmái mearrasámi guovlluin, gos eanet ja eanet olbmot váldet ruovttoluotta sámi identitehtaset, dadjá sámediggepresideanta Silje Karine Muotka (NSR).
Dasa lassin evttohuvvojit lasáhusat guovtti eará doaibmabidjui mearrasámi guovllus, namalassii Áltái.
– Lean ilus go beasan muitalit ahte mii maiddái vuoruhit addit lasáhusa sihke Sámi musihkkafeastavahkkui Álttás 300.000 ruvnnuin ja Álttá siidii 100.000 ruvnnuin. Dat leaba goappašagat mielde ovddideamen dehálaš kulturdoaibmabijuid mearrasámi guovllus, dadjá mearrasápmelaš Muotka gii ieš orru Álttás.
Sámi musihkkafeastavahkku oažžu oktiibuot 486.000 ruvnno 2024:s. Álttá siida oažžu oktiibuot 651.000 ruvnno. Mearrasiida oažžu oktiibuot 1.509.000 ruvnno ja Mearrasámi siida oažžu ges oktiibuot 403.000 ruvnno.
– Gáržžes bušeahttajagis vuoruhit ealáhusdoaimmaid mearrasámi guovllus, earret eará váikkuhit divodanbargguid maŋŋá dáruiduhttima. Duohtavuođa- ja soabadankommišuvdna lea duođaštan man ollu lea manahuvvon dain guovlluin, dadjá sámediggeráđđi Runar Myrnes Balto (NSR).
Sámediggeráđđi evttoha maiddái joatkit mearrasámi vuoigatvuođaprošeavtta Borjadat 500.000 ruvnnuin, ja doarjaga fatnasiidda ja mariidna ealáhusaide 2,7 miljon ruvnnuin.
Sámediggeráđi ollislaš bušeahttaevttohus almmuhuvvo vuossárgga skábmamánu 6. beaivvi.
