Dássážii lea festiválajođiheaddji Marita Kristin Eilertsen doaimmahan Márkomeanu beaivválaš doaimma okto, muhto dál lea Susanne Amalie Langstrand-Andersen boahtán sutnje ustibin, go son álgá festiválabuvttadeaddjin.
Dássážii lea festiválajođiheaddji Marita Kristin Eilertsen doaimmahan Márkomeanu beaivválaš doaimma okto, muhto dál lea Susanne Amalie Langstrand-Andersen boahtán sutnje ustibin, go son álgá festiválabuvttadeaddjin.
Ovttas galgaba soai joatkit maŋŋá go buvttadeaddji máŋggaid jagiid čađa, Ellen Berit Dalbakk, celkkii ahte son geassádii maŋŋá 2015 festivála.
Ii goabbáge, ii Eilertsen iige Langstrand-Andersen, leat ođas dán 16-jahkásaš festiválas. Festiválajođiheaddji Eilertsen lea leamaš mielde 2009 rájes, ja válddii badjelasas jođiheaddjidoaimma 2014:s. Langstrand-Andersen leamaš sihke stivrras ja sus leamaš iešguđetlágan “čávvadoaimmat” vuosttaš festivála rájes 1999:s, čállet odne Márkomeannu neahttasiiddustis.
– Álggán buvttadeaddjin vuollegašvuođain. Márkomeannu lea mearkkašan munnje hui ollu persovnnalaččat, nu ahte lea sihke máilmmi somá ja veahá issoras oažžut lobi leat mielde viidásat mátkkis, muitala áiddo virgáduvvon buvttadeaddji.
– Borgemánus golggotmánnui lean leamaš okto kantuvrras, muhto dál mus lea Susanne maid dáppe. Šaddá hui buorre ahte lea soamis geainna sáhtán jurdagiid lonuhallat. Márkomeannu lea ollu searvevuođa birra, lea hirbmat ovdamunnin ahte galge leat guovttis geat doaimmahetne beaivválaš doaimma, dadjá festiválajođiheaddji Eilertsen.
Sávvet eambbosiid searvat
– Justa dál álgá dan 40 fiinna olbmo bargu geat galget plánet ja čađahit Márkomeannu 2016, muhto ain lea sadji eambbosiidda, dadjá festiválajođiheaddji Eilertsen, ja bovde buohkaid geain lea miella veahkehit.
– Vahkkuloahpa golggotmánu 16.-18. b. lea mis kick-off čávvii Vilgesváris. Mii áigut idjadit lávus, plánet 2016 ja deattuhit geavahit eanet sámegiela siskkáldasat čávas, loahpaha Langstrand-Andersen.
Márkomeannu 2016 lágiduvvo duorastaga suoidnemánu 28. b – 30. b.
Marita Kristin Eilertsen ja Susanne Amalie Langstrand-Andersen leaba goappašagat virgáduvvon 50 % virggis, ja lea kantuvrabáiki Várdobáiki sámi guovddážis Spáŋggus Evenáššis.
