Juovllaid válljejuvvui ođđa Márkomeannustivra geat áigot rievdadit festivála organisašuvdnahámi oasussearvin lagamus áiggi.
Juovllaid válljejuvvui ođđa Márkomeannustivra geat áigot rievdadit festivála organisašuvdnahámi oasussearvin lagamus áiggi.
Festivála Márkomeannu viehkala jagi 2016 sisa, ja juovllaid válljejuvvui áibbas ođđa stivra festiválii. Ođđa stivrajođiheaddji Eirik Larsena áigodagas, lea festiválas ulbmil šaddat oasussearvin.
Bargá departemeanttas
Eirik Larsen, guhte lea riegádan ja bajásšaddan Junterođus Skániid márkogiliin, muitala sus lea álo leamaš earenoamáš čanasteapmi su ruovttogili festiválii.
– Lean leamaš sihke eaktodáhtolaš bargin ja festiválamannin álggu rájes 1999as, ja illudan beassat álgit stivrajođiheaddjibarggu. Mu bargu lea vuosttažettiin loktet Márkomeanu ođđa áigái, muitala Larsen, guhte lea oahpahallan jurista ja bargá Sámi- ja minoritehtapolitihkalaš ossodagas Suohkan- ja ođasmahttindepartemeanttas.
Olbmuid vásáhus ii rievdda
Ođđaválljejuvvon stivrajođiheaddji čujuha Márkomeannu Searvvi ođđasisorganiserenprosessii maid bijai johtui 2015:s. Ođđasisorganiserema ulbmil lea nuppástuhttit festivála organiserenvuogi eaktodáhtolaš searvvis oasussearvái, ja dasa lassin veahkehit profešonaliseret ja ovdánahttit festivála.
– Organisašuvnnas leat máŋga rievdadusa jođus, muhto festiválaguossit besset ain vásihit Márkomeanu nu go mii dovdat dan otne. Ain galgá dát earenoamáš kulturvásáhus maid beare fal oažžu Márkomeanus leat guovddážis, sihkkarastá ođđaválljejuvvon stivrajođiheaddji.
Ovttas festiválajođiheddjiin Marita Eilertsen, galgá Larsen bearráigeahččat ahte festiválaguossit ain besset vásihit Márkomeanu máŋga jagi ovddasguvlui.
Viiddis festiválafálaldat
Márkomeannu lea sámi musihkka- ja kulturfestivála mii jahkásaččat lágiduvvo Evenášši ja Skániid suohkanrájis. Festivála ovdanbuktá juohke jagi sámi artisttaid, dáiddáriid ja kulturolbmuid olles sámi guovllus. Prográmmas gávnnat musihka, visuála dáidaga, lávdedáidaga, girjjálašvuođa, semináraid, valáštallamiid, vádjolusaid, sámi márkana, ja vel sierra mánáid- ja nuoraidprográmma.
Ođđa stivrras leat:
Stivrajođiheaddji: Eirik Larsen.
Nubbijođiheaddji: Camilla Brattland (ovddeš Riddu Riđđu jođiheaddji Gáivuonas).
Lars Theodor Kintel (nuorra, sámi gründer Divttasvuonas).
Ellen Berit Dalbakk (ovddeš Márkomeannu-buvttadeaddji).
Beatrice Fløystad (máŋggajahkásaš festiválabargi ja ovddeš jođiheaddji Márkomeanus).
1. várrelahttu: Ane Margrethe Ugelvik.
2. várrelahttu: John Andreas Myrnes Balto.