Gárrenolbmuid dihte lea Finnmárkku poliiijain leamaš olu bargu mannan ija.
Leavnnjas čuožžilii soahpameahttunvuohta muhtun olgobáikkis das lei go guossi ožžon beare olu alkohola vai ii. Vákta oaivvildii su beare gárremiin, muhto guossis lei ain goiku. De bohte politiijat ja ledje ovttaoaivilis vávttain ahte gal guossi lei ožžon nohkka juhkamuša. Son fertii de guođđit čoahkkebáikki.
Álttá gávpotguovddážis fertejedje politiijat vuojihit 55-jahkásaš dievdoolbmo ruoktot go lei beare gárremiin. Maŋŋelaš fertejedje politiijat bissehit feastta máŋgga ássanviesus, go vurje ránnáid.
Hámmárfeasttas ožžo politiijat dieđu doarruma birra. Sii manne báikái ja doppe ledje nuorat geat dušše dahkaludde doarrume, muhto gárremiin sii gal ledje. Okta vikkai veahá diggot politiijaiguin ja dan dihte gohččojuvvui guođđit gávpotguovddáža.
Politiijat fertejedje maid humadit muhtun gárrenolbmuin gii maid vikkai bigohallat, ja dievdu de ii beassan fitnat šat olgobáikkiin dan ija.
Maŋŋelaš gávdne politiijat nuppi eará dievddu gii lei beare gárremiin, ii ge son dohkkehan ahte ii beasa olgobáikkiide, ja dan dihte fertii son idjadit arreasttas.
Girkonjárgga gávpotguovddážis lei muhtun hoigadan nuppi olbmo ja čárven su čoddagii. Dás ásahit politiijat ášši.
Girkonjárggas leat maid leamaš feastariejat maid politiijat leat ferten fitnat bisseheame.
Politiijat gohččo maid muhtun biilavuoddji váldit eret svennjodahttinfilmmaid biilalásiin. Dan son maid dagai dakkaviđe.
