-Almmuhus-
OĐĐASAT Mánáidgárde­bargi váldon gidda­gassii

Mánáidgárde­bargi váldon gidda­gassii

-

-

Finnmárkku poltiijat leat váldán giddagassii mánáidgárdebargi gii várohuvvo seksuálalaččat illastan máná.

Finnmárkku politiijaguovlu ožžo lávvordaga 26.10.19 diibmu 14.30 fuolahusdieđu dievddu birra gii bargá muhtun mánáidgárddis Nuorta-Finnmárkkus. Dán dieđiha politiijaguovlu preassadieđáhusas.

 Politiijat álggahedje dalán guorahallanášši ja dutkagohte ášši.

Válde giddagassii

 Sotnabeaieahket lea politiijat váldán giddagasii dievddu go várohit ahte lea rihkkon ráŋggáštuslága ja seksuálalaš daguid dahkan máná vuostá.

– Jorret ságat

 Finnmárkku politiijaguovllu operašuvdnajođiheaddji Ann Rigmor Søderholm, lohká ahte sii leat aitto dutkagoahtán ášši:

– Mii diehtit ahte jorret olu ságat ášši birra gielddas gos dát lea dáhpáhuvvan, ja dan dihte leat mii mearridan sáddet dán preassadieđáhusa ja ávžžuhit olbmuid ahte eai juoge guorosságaid ášši birra.

Dutket viidát

Søderholm muitala ahte sii dutket ášši viidát, ja dutkama geažil eai atte dál eahkes eambbo dieđuid ášši birra.

 Søderholm namuha vel ahte gieldda jođiheapmi gos dát lea dáhpáhuvvan lea ožžon dieđu ášši birra.

- Advertisement -
-Almmuhus-