Badjel 40-jahkásaš dievdu lea váldon gitta ja áššáiduhtton rohcošan mánáin Álttás.
Badjel 40-jahkásaš dievdu lea váldon gitta ja áššáiduhtton rohcošan mánáin Álttás.
Maŋŋebárgga eahkeda dieđihedje politiijat ahte leat áššáiduhttán badjel 40-jahkásaš mánáidgárdebargi Álttás go galgá leat seksualálaččat illastan muhtin máná.
Politiijat eai dáhto muitalit nu olu ášši birra ovdal lágidit preassakonferánsa odne diibmu 12.00.
Dahkan duoguštemiid
Dievdu bargá muhtin mánáidgárddis Álttás. Son váldui gitta golggotmánu 11. beaivvi, ja lea biddjon guovtti vahkkui háldogiddagassii.
Politiijat galget dahkan duoguštemiid dievddu ruovttus, muhto sii eai háliit muitalit maid leat gávdnan.
– Dutkama geažil eai sáhte politiijat muitalit eambbo áššis, lohká Álttá leansmánni Svein Tore Nilsen Altaposten aviisii.
Eai dieđe leat go eambbo mánát illástuvvon
VG aviissa dieđuid mielde dieđihedje máná váhnemat seksualálaš illasteami birra.
Altaposten čállá ahte politiijat eai dieđe leat go eambbo mánát illastuvvon.
– Lea menddo árrat dadjat leat go eambbo mánát gillán, lohká Nilsen.
Mánáidgárdebargi ii leat oahpis politiijaide.
Ii mieđit
Dievddu bealušteaddji lea Håkon Helsvig.
Son dadjá aviisii ahte dievdu ii mieđit seksualálaččat illastan máná, ja áššáiduhttin čuohcá garrasit mánáidgárdebargái.
Ožžon dieđu
Váhnemat ja mánáidgárddi fuolaheaddjit gos dievdu bargá leat ožžon dieđu ášši birra.
– Váhnemat ja ossodaga fuolaheaddjit gos áššáiduhtton bargá leat ožžon dieđuid ášši birra, lohká Álttá sátnejođiheaddji Monica Nielsen iFinnmark neahttaaviisii.
