Sámediggeráđđi Thomas Åhrén lea vuollánan dan geažil mii boahtá ovdan otnáš oaiviliskkadeamis miellaguottuid birra Finnmárkku boazodollui. –Muhtumat geavahit válgagičču oččodit olbmuid jáhkkit ahte boazodoallu dat goazaha ovdáneami fylkkas. Dat lea dohkketmeahttun ja das ii leat historjá.
Sámediggeráđđi Thomas Åhrén lea vuollánan dan geažil mii boahtá ovdan otnáš oaiviliskkadeamis miellaguottuid birra Finnmárkku boazodollui. –Muhtumat geavahit válgagičču oččodit olbmuid jáhkkit ahte boazodoallu dat goazaha ovdáneami fylkkas. Dat lea dohkketmeahttun ja das ii leat historjá.
Sámediggeráđđi Thomas Åhrén lea vuollánan dan geažil mii boahtá ovdan otnáš oaiviliskkadeamis miellaguottuid birra Finnmárkku boazodollui.
– Muhtumat geavahit válgagičču oččodit olbmuid jáhkkit ahte boazodoallu dat goazaha ovdáneami fylkkas. Dat lea dohkketmeahttun ja das ii leat historjá.
Oaiviliskkadeamis mii odne lea čađahuvvon NRK Finnmark ja iFinnmark áviissain boahtá ovdan ahte badjel bealli (54 %) geain jearahuvvui oaiviliskkadeamis, oaivvildit ahte eanemus berre vuhtii váldit elfápmo- ja industriijadoaimma doppe gos dán lágan industriija lea vuostálága boazodoaluin. Dušše 24 % oaivvildit ahte boazodoallu galgá vuoruhuvvot.
Boazodoalu dorjot eanemusat jienasteaddjit geat leat vuollel 30 jagi.
– Boazodoallu lea áiggi mielde loahpadan ollu guohtoneatnamiid juohkelágan ovddideapmái ja huksemii. Dat leat viesso- ja industriijaguovllut, astoáiggedoaimmat, elfápmolinját, geainnut, ja eará servodathuksejeaddji doaimmat mat gáibidit ollu areálaid. Illá gávdno dakkár ealáhus dán riikkas mii maŋimuš logi jagis lea ferten dohkkehit nu stuorra gáržžidemiid sin rámmaeavttuid ektui go juste boazodoallu, dadjá sámediggeráđđi Thomas Åhrén.
Åhrén deattuha ahte muhtun guohtonguovlluin dál leat nu ollu bahkkemat areálaide. Oktiibuot dagaha dát birget go vai ii ealáhusas. Son ádde danne bures manne boazodoallit dáistalit birgejumiset ovddas.
– Muhtumin ferte dieđusge dohkkehit ahte stuorraservodaga dárbbut leat deaŧalaččat. Muhto ii sáhte oaivvildit ahte dat lea imaš dahje nággovuloš go ealáhus ieš duođai berošta iežas eavttuin, vuoigatvuođain ja sin boahtteáiggis. Makkár eará ealáhusat barget árjjalaččat iežaset ealáhus heaittihemiin, jearrá Åhrén.
Åhrén oaivvilda ahte lea paradoksála go riikaoasi luondu ja kultuvra, erenoamážit sámi kultuvra, fuomášuvvo dađistaga eanet ja eanet nationála ja riikkaidgaskasaš dásis. Riikkaidgaskasaš ruvkeindustriija rahčá gánnáhahttivuođain. Dattetge leat ruvkeindustriija ja stuorra biras- ja luondduduohtadeamit maid muhtun álbmotválljen olbmot deattuhit áidna čoavddusin fylkii.
Son lasiha vel ahte su mielas iskkadeamis orru dego livččii duogášjurdda.
– Iskkadeamis lea boazodoallu biddjojuvvon ruvke- ja elfápmoindustriijain vuostálaga. Livččii sáhttán válljet jearrat álbmoga oainnuid ruvke- ja elfápmoindustriijai jos dat bohtet vuostálága plánaiguin hukset viesuid ja bartaguovlluid, vázzin- ja skohtermáđijaid, johka- ja sáivaguollebivdduin dahje eará deaŧalaš servodatberoštumiiguin fylkkas. Nie ii dahkkojuvvon, dadjá Åhrén.
