Guovdageainnu searvegodderáđđi lea rievdadan mearrádusa ja suovvá Maria Arredondo doallat konseartta Guovdageainnu girkus čakčamánu 29. beaivvi, vaikko álggos eai suovvan.
Guovdageainnu searvegodderáđđi lea rievdadan mearrádusa ja suovvá Maria Arredondo doallat konseartta Guovdageainnu girkus čakčamánu 29. beaivvi, vaikko álggos eai suovvan.
Norgalaš artista Maria Arredondo ja Torstein Sødal leaba vuolgime musihkkamátkái Finnmárkui gos áiguba girkuin lávlut. Muhto Guovdageainnu girkui beassat lávlut ja čuojahit ii lean nu álki, go searvegotteráđđi lei hilgon Arredondo ohcamuša ahte beassat lávlut girkus.
– Dalle go hilgguimet ášši mis eai lean nu ollu dieđut go dál maŋŋil go meannudeimmet fas ášši, muitala Guovdageainnu searvegodderáđi nubbijođiheaddji Risten Turi Aleksandersen.
Maŋŋel go Guovdageainnu searvegodderáđđi hilggui ohcama, de artisttat almmuhedje čuojahanbáikin Guovdageainnus šaddá Diehtosiidda auditorium.
Ikte ges artista Maria Arredondo fas almmuhii ahte Guovdageainnus lágidit konseartta Guovdageainnu girkus.
Dimitri joavku
Aleksandersen lohká ohcamušas ledje váilevaš dieđut, ovdamearkka dihte ahte Maria Arredondo lei áigon oasi konsearttas doallat fárrolaga Guovdageainnu koarain, Dimitri joavkkuin.
Dan birra eai lean dieđut ohcamušas.
– Maŋŋel bohte Dimitri joavkku lahtut muitalit ahte sii galget searvat dan konsertii. Mii ságastalaimet dan ášši ođđasit. Galgat go mii geahččalit goitge dainna lágiin dahkat ahte sihtat Maria Arredondo sihkkut eret daid lávlagiid maid mii oaidnit eai leat risttalaš lávlagat.
Konsearta lágideapmi lávlaga duohken
Guovdageainnu searvegodderáđis eai loga Dimitri joavkku rievdadan mearrádusa, muhto koara lahtut bukte lassi dieđuid.
– Sii leat beare buktán eambbo dieđuid dan konseartta birra. Go Dimitri joavku válddii oktavuođa ja mii humaimet siiguin ja muitaleimmet mot leat min njuolggadusat, ahte min njuolggadusaid mielde girkus fertejit risttalaš lávlagat ja ferte sihkkut eret daid mat eai leat. Lea okta lávlla man mii leat sihtan sin sihkut eret. Maria lea ieš miehtan ahte sihkku eret, ahte ii lávllo dán. Dimitri joavku lei dainna lágiin mielde ahte jerre sáhttit go ođđasit geahččat ášši.
Illudit ja áigá ráhkkanan
– Dieđusge mun lean gullan! Mii leat ráhkkanišgoahtán áigá jo. Mii leat hárjehallagoahtán iežamet bihtáid. Mii leat álgán hárjehallat ovdal go diđiimet beassat go girkui vai eat. Háliideimmet searvat dasa ja mis livččii eará báiki gos livččiimet doallan dan konseartta. Geahččaleimmet Dimitri joavkku stivrra bealis váikkuhit searvegodderáđi vai beassat doallat konseartta. Dál mii leat hui movttegat go válde vuhtii min! muitala koara jođiheaddji Ellen Marit Sofie Mienna.
Dimitri joavku, Maria Arredondo ja Torstein Sødal galget Guovdageainnu konsearttas ovdanbuktit sierra guokte lávlaga ja njeallje dahje vihtta fárrolaga artisttaiguin.
Muđui Maria Arredondo ja Torstein Sødal galgaba doallat Finnmárkkus oktiibuot 18 konseartta. Ávvir ii lihkkostuvvan oažžut ságaide Maria Arredondo.
