Sámi siida searvi Ohcejogas bovde buohkaid dán vahkkoloahpa gárdeskuvlii Skállovárrái Ohcejohkii.
– Mii loktet ovdan boazosámi árbemáhtu mii dán áigge lea vajálduvvame mohtorfievrruid ja ođđaáigge veahkkeneavvuid dihte ja jođánis gárddástallama dihte, čilge Åsa Márgget Anti preassadieđáhusas.
– Mii oaidnit ahte min boazoárbemáhttu ja kultuvrra árvvut báhcet biergobuvttadeami ja ekonomalaš gáibádusaid dihte.
Dehálaš fuomášuhttit sátneriggodaga
Láidesdeaddjit skuvllas leaba Åsa Márgget Anti ja Máret Iŋgá Länsman. Boazodoallofága
oahpaheddjiid mielas lea dehálaš fuomášuhttit sátneriggodaga mii gullá bohccui ja boazobargguide.
– Gárdeskuvllas mii buđaldat, muittohallat, máinnastit, stoahkat, njoarostit, lávlut ja juoiggadit, vai muitit buorebut.
Deaivvadanbáiki olbmuide dán áigge jagis
Dáid vahkkuid leat gárddástallamat, ja olu olbmot johtet gárdde luhtte geahččamin ja geassimin veahkkin bohccuid. Anti lohká dan hui somán. Dát áigi ja báiki lea dehálaš deaivvadanbáiki olbmuide dán áigge jagis.
– Bargguid áigge eat goitge geargga háleštit, verddestallat ja olmmošgaskavuođaid dikšut, ja boazoságaid lonohallat. Háliidetne bovdet olbmuid Skállovárrái jo ovdal girdnema, beassat ovttastallat ja ráfis háleštit, muittašit, lávllodit ja oahppat nubbi nuppis, muitala nubbi láidesteddjiin, oahpaheaddji Máret Iŋgá Länsman.
Jurddašuvvon buohkaide
Skuvla ii leat meinejuvvon dušše sidjiide geain lea gullevašvuohta boazoealáhussii. Gáibádus boahtit skuvlii ii leat gullevašvuohta boazodollui.
– Olbmot galget dovdat sidjiide lea buresboahtin deike vaikko sis ii leat alddineaset gullevašvuohta boazoealáhussii, dadjaba Anti ja Länsman, geat guktot gullaba Sámi siidda searvái ja Ohcejoga Gálddoaivve bálgosii.
Skállováris lea gárdeskuvla doaibman 25 jagi, ja sihke Ohcejoga ja Sirpmá mánát ja nuorat goabbat beale Deanu leat viššalit gallestallan Skállovári skuvlaáigge.
– Lea dehálaš fievrredit dieđu ja máhtu sámiid gaskkas maid dihtomielalaččat go boazodilis lea ain hui dehálaš mearkkašupmi sámekultuvrii.
Dál besset earátge boahtit dán oahppanboddui, soai bovdeba iluin Sámi siidda searvvi bealis.
