Luossareiveeaiggádat ja Luossabivdosearvi stevdnejit stáda.
Luossareiveeaiggádat ja Luossabivdosearvi stevdnejit stáda.
Deanočázádaga luossareiveeaiggádat ja Luossabivdosearvi leat mearridan stevdnet stáda. Dan dieđihit luossareiveeaiggádat ja luossabivdosearvi preassadieđáhusas.
– Stáhta oažžu fargga dieđu stevdnema birra, čállet preassadieđáhusas.
Iskkadit lobálašvuđa
Sii čállet ahte leat álggahan riekteproseassa gávnnahan dihte Deanosoahpamuša lobálašvuođa.
Sii čujuhit maid Guruha joavkojođiheaddjái Stuoradikkis gii Finnmarken aviisii logai ahte livčče vuogas oažžut rievttalaš čielggadeami áššis.
– Dá lea juoga maid Stuoradiggeeanetlohku ii dahkan go dohkkehedje Deanosoahpamuša, čállet sii.
Čuoččuhit rihkkut ILO konvenšuvnna
Stevdnejeaddjit eai oainne eará čovdosa go stevdnet. Dan lohká Rune Aslaksen, Luossareiveaiggádiid stivrajođiheaddji.
– Go stuoradiggeeanetlohku, Olgeš, Gurut, Risttálaš Álbmotbellodat ja Ovddádusbellodat válljejedje min rivttiid duvdit eret. Rivttiid maid mii leat guhkit áiggi geavaheami bokte ožžon, ja mat leat Deanulágas ja Alimusrievttipraksisas nannejuvvon. Dalle eat oainne eará čovdosa go diggái loktet ášši, lohká Aslaksen.
Sii moitet go stáhta addá Lulli-Suoma bartaeaiggádiidda rivttiid, ja čuoččuhit ahte stáhtas ii leat dat váldi.
– Dat juolludeapmi duolbmu min rivttiid mat leat suddjejuvvon vuođđolágas, ILO konvenšuvnna nr. 169, ja siviila ja politihkalaš rivttiid internašunála konvenšuvnna. Ii leat guorahallon movt ášši dáid guoskkaha ovdal go mearridedje dohkkehit soahpamuša, čállet preassadieđáhusas.
Maŋemuš čoavddus
Sii eai leat oaidnán ahte ii boađe šat politihkalaš čoavddus dán áššis.
Danne lea sin mielas bággu álggahit rievttalaš proseassa, vai sáhttet sihkkarastit iežaset rivttiid, sihke sin iežaset dihtii, ja boahttevaš buolvvaid dihtii.
– Báikkálaš bivdu Deanočázádagas lea okta dain maŋemuš sámi árbevieruin, mii áin čađahuvvo. Lea mearehis dehálaš báikki olbmuide, ja dál lea árbevierru jávkame go stáhta lea ráhkadan šiehtadusa mii rihkku min vuoigatvuođaid.
