Kárášjohkalaš Alice Balto searvá goalmmát háve jo of300 gilvui, muhto ii loga deháleamos mihttun gal vuoitit, muhto baicce ceavzit olles gilvvus.
Kárášjohkalaš Alice Balto searvá goalmmát háve jo of300 gilvui, muhto ii loga deháleamos mihttun gal vuoitit, muhto baicce ceavzit olles gilvvus.
Alice Balto, gii bargá Ávviris journalistan, gilvalii diibmá maiddái Tom Hugo Palusenin ja čađaheigga gilvvu badjelaš 30 diimmus.
Dán jagi leaba soai ožžon vel goalmmát guoimmi Team JarleBoine/Jakobsen jovkui, Ruth Cecilie Jakobsen, sihkarastin dihte návccaid.
Ii lea stuorámus mihttu
Balto orru Álttás ja lea áŋgiris sihkkelasti, muhto stuorámus niehku sus ii goittot leat vuoitit gilvvu, mii govviduvvon Europa eanemus gáibideaddji meahccesihkkelgilvun.
Loga maid: Oahpásmuva sihkkelastiide
Dárbu bidjat mihttuid
– Dat lei diibmá okta Hámmárfeastta almmái gii ieš lea bures birgen, gii jearai mus ahte manin mun gillen juohke jagi searvat, vaikko in leat buoremusaid searvvis. Vástidin ahte juohke olbmos dáidá dárbu, mas bidjá alccet mihttuid. Muhtinlágan veadjemeahttumis olahusa, maid lea dehálaš čađahit iešguđet suorggis. Ja dát lea mu mihttu, deattuha son.
Illudahttá ja baldá
Alice Balto lohká Offroad Finnmark gilvvuid leat juoga, mas juogo ballá dahje liiko.
Dat sáhttá sihke illudahttit, muhto maiddái baldit.
– Go olmmoš vuosttaš háve searvá, de juogo ballá dahje oažžu eambo miela searvat viidáset. Mun háliidin joatkit gilvalemiin ja ožžon eambo motivašuvnna. Ii leat gilvu masa beare dieđihat iežas mielde ja go de gávnnahat ahte it šat gille, de attát vuollái. Dát lea beare juoidá maid fertet čađahit, deattuha son.
Ceavzit mollii
Diibmá nagodiige son buoridit iežas áiggi 2014 gilvvuid rájes, muhto dán jagi mihttu lea dušše čađahit gilvvu ja ceavzit mollii.
– Vuosttaš jagi ledjen hui ceaggái iežan mihttuin, muhto ledjenge maiddái buorebut hárjehallan ovdal dan gilvvu. Diibmá in buoridan áktánas iežan áiggi, muhto ledjen duhtavaš go mađiija lei losit go jagi ovdal. Dán jagi in lea áibbas sihkar iežan mihttuin, go mus leat garra guoimmit ja dáiddan šaddat dat njoazimus, dovddasta son.
– Mii leat gal bidjan mihttun 32 diimmu, muhto fertet oaidnit mii dán jagi geavvá, go gilvomađiija lea nu stánžžas ja boahtá gáibidit oalle ollu návccaid, čilge son.
Dego heajos niehku
Kárášjohkalaš lohkáge iežas leamaš guorramin ja hárjehallamin gilvomađiijas Álttá guovllus.
– Gal dat lea lossat. Dat lea measta nu ahte lea dego heajos niehku. Dat lea nu lossat ahte boaldá juolgedehkiid ja beassat gal vissa ráhččat dán jagi, čilge son.
