Dás beasat veaháš oahpásnuvvat dán jagáš Sámi Grand Prix juigiiguin.
Dás beasat veaháš oahpásnuvvat dán jagáš Sámi Grand Prix juigiiguin.
Mathis Ole Vars, Vuohčču.
«Biret Ingermaria Vars»
Mathis Ole Vars juoigá iežas nieidda, ja soai leaba guoktin ráhkadan dan luođi. Son muitala su nieiddaš, go lei beannotjahkásaš, lávii juoigat dan luođi.
– Mun báddejin dalle, muhto orui oanehaš. Mun de dás jagi áigi dievasmahtten luođi, ja jurddašin geahččalit searvat Sámi Grand Prixii. Vars lea nuppes mielde, ii ge loga iežas nu gallii juoigan ollu olbmuid ovddabealde, muhto jáhkká mannat bures.
Nils Lars Eira, Kárášjohka
«Niillas Risten»
Nils Lars Eira juoigá iežas nieidda. Son muitala luohti bođii fáhkka sutnje, ja son diđii ovttatmano ahte dat lei su nieidda luohti.
– Luohti govahallá makkár olmmoš Risten lea. Eira lohká iežas luohteberošteaddjin ja son leage oktii ovdal leamaš mielde. Son lohká šaddat gelddolažžan fas searvat Sámi Grand Prixii.
Ravna Anti Guttorm, Kárášjohka
«Aslat Johanas»
Ravna Anti Guttorm juoigá iežas áhkkuba. Anti Guttorm muitala su áhkkut orru máddin ja eaba šatta nu jámma oaidnalit.
– Luohti bođii go áibbašin su ja mu mielas orru váilume juoga jus ii leat luohti. Son lea leamaš njeallje geardde mielde Sámi Grand Prixas ovdal.
Marit Inga Sara Pettersen, Áltá/ Guovdageaidnu
«Kim Rune»
Marit Inga juoigá iežas bárdni. Son čilge dat lea ođđa luohti ja luohti dat bođii fáhkkestaga.
– Jurddašin geasa dat heivešii, ja go dovdá máná ja máná luonddu, de dat luohti heivii mu bárdnái. Son lea oktii leamaš mielde ovdal Sámi Grand Prixas, ja jáhkká šaddat garra gilvun go leat ollu čeahpes juoigit mielde.
June Brita Eira, Guovdageaidnu
«Else Kristine»
June Brita Eira juoigá iežas nieidda.
– Dat lea mu áidna nieida ja lea hui mávssolaš munnje. Eira ii leat ovdal leamaš mielde Sámi Grand Prixas. – Lean juoigan veaháš ovdal ja lean leamaš Sámi allaskuvllas geassekurssas gos ohppen jiena geavahit. Olusat leat árvalan in go searvva, ja dán jagi heivii munnje bures.
Issat Sámmol Hætta, Máze
«Siv Kristine»
Issat Sámmol Hætta juoigá iežas neabi.
– Luohti bođii biekka mielde ja galggašii gullot dat govvida su luonddu, iešvuođaid ja makkár olmmoš son lea. Son lea mielde leamaš golmma geardde ovdal. Sámi Grand Prix lávlunoasis lea maid su ráhkaduvvon lávlla mielde dán jagi.
Per Nilsen Bueng, Guovdageaidnu
«Tony»
Per Nilsen Bueng juoigá iežas bártni. Son muitala go son muhtumin láve jurdilit olbmuid birra, de láve luohti boahtit fáhkkestaga. Son lea golmma geardde leamaš mielde ovdal.
– Go mu viellja vuittii oassegilvvu, de fertejin mun maid sáddet luođi vai beasan suinna maid gilvalit.
Nils Mikkelsen Sara, Máze
«Oddbjørg Hætta Sara»
Nils Mikkelsen Sara juoigá iežas eamida. Son lea vuosttaš geardde mielde Sámi Grand Prixas.
Johan Ivvar Gaup, Máze
«Mikkel Andreas»
Johan Ivvar Gaup juoigá iežas vuosttašvilbeali. Luođi lea su eanu, Mikkel N.N. Eira, bidjan iežas bárdnái.
– Mu vilbealli lea jaskeslunddot olmmoš ja luohti govvida dan. Gaup ii leat ovdal searvan Sámi Grand Prixii. – Šaddá somás vásáhus, ja sávvamis manná bures ja ahte nagodan juoigat.
Johan Mikkel Bueng, Guovdageaidnu
«Nilut Lasse Elle Magga»
Johan Mikkel Bueng vuittii oassegilvvu Norggas, ja juoigá Sámi Grand Prixas vuosttaš geardde. Son juoigá iežas eamida.
– Luohti lea áibbas ođas ja bođii nuppe beaivvi maŋŋel oassegilvvu. Son ii leat nu ollu jurddašan movt manná gilvvus.
– Munnje gal lea vuoitun go beasan iežan eamida gudnejahttit luđiin mii boahtá njuolga váimmus.
Neeta Jääskö, Ánár
«Oobiš»
Neeta Jääskö vuittii oassegilvvu Suomas, ja son juoigá iežas nuppi unnaoappáža.
– Luohti beare bođii munnje ja lei veaháš smiehttamuš gean dat lei luohti. Jääsko ii leat ovdal leamaš mielde Sámi Grand Prixas, iige fitnan Guovdageainnus.
– Šaddá oalle vásáhussan searvat gilvui, ja maiddái vásihit beassášmárkaniid maid birra lean dušše gullan ovdal.
Johan Anders Bær, Kárášjohka
«Erke»
Diimmá Sámi Grand Prix vuoiti Johan Anders Bær juoigá Bikko Áillu Ristena Erke.
– Son orru máddin ja sus lea eadni sápmelaš. Son láve ieš huradit, ja luohti lea ráhkaduvvon sullii dan láhkái. Bær lea njealját geardde searvame, ja lohká iežas áigut geahččalit fas vuoitit.
