Vaikke Ruošša beal Sámis leat unnán sámegielagat, de nákcejit ovddidit leudema.
Vaikke Ruošša beal Sámis leat unnán sámegielagat, de nákcejit ovddidit leudema.
Go Juoigiid searvi ásahuvvui 20 jagi áigi dassái, de eai lean sis Ruošša beal Sámi miellahtut.
Ávvudoaluide ledje njeallje leudejeaddji boahtán ja lei Domna Khumjuk guhte muitalii makkár dilis sin luohteárbevierru lea.
– Leuden lea dološ sámi musihkkaárbevierru mii lea unnán dutkojuvvon dan sivas go dolin váillui čállingiella. Maiddái dál leat Ruoššas unnán sámegielagat ja dat váikkuha leudema ovdáneapmái. Leudemis han leat guhkes dajahusat mat muitalit olbmo dahje dáhpáhusa birra. Dattetge eat vuollán, ja mii bargat garrasit dan nammii ahte eambbosat álggáše leudet, muitalii Khumjuk luohtesemináras mii lágiduvvui Romssas mannan vahkkus.
4 buolvva
Son muitala ahte sin bearrašis leat nagodan doalahit leudema njealji buolvvas.
– Mu áhkku leudii jo 1880-logus ja mu eadni ges 1920-logus. Maiddái mu nieida lea álgán leudet ja dat mearkkaša ahte min bearrašis leat njeallje buolvva leudejeaddjit, dajai leudejeaddji Domna Khumjuk.
Son muitala ahte leat nagodan háhkat eanet dieđuid leudema birra dan rájes go serve Juoigiid searvái ja dasa lassin leat oahpahan leudema eanet mánáide.
– Mánáid leudenjoavku stuorru. Ovdal mis ledje 10 máná, muhto dat leat lassánan golmmain. Sii leat hui čeahpit ja ieža leat hui rámis, muitalii Domna Khumjuk.
