– Lean nu čuorbi dakkár árvádusain 

1. «Goahtoeanan» lea dovddus lávlla man earret eará Catarina Utsi, Intrigue ja Deatnogátte Nuorat lávlot. Gii čálii dan teavstta?

– Dákkár gažaldagaid in máhte, ha-ha! Lea go son diet Valkeapää?

Ii, lea Paulus Utsi. RIEKTA!

2. Goas lágiduvvui vuosttaš geardde máilmmimeašttirgilvu spábbačiekčamis nissoniidda?

– Lei goit 1900-logus. Mun logan 1981. BOASTUT!

Rievttes vástádus: 1991

– Vuoi, ledjen oalle lahka!

3. Guđe fylkii gullá Ánddasuolu?

– Ánddasuolu lea Nordlándda fylkkas. RIEKTA!

Ingá Máret ii mana viidásat álgovuorus, go vástidii riekta dušše guovtti dain golmma gažaldagas.

Son beassá aŋkke vástidit árvádussii, main sáhttá oažžut 5, 10 dahje 15 čuoggá. 

Rukses árvádusas oažžu 15 čuoggá, alit árvádusain oažžu 10 čuoggá ja ruoná árvádusain ges 5 čuoggá, ja ivnnit leat áŧestuscehkiid mielde ráhkaduvvon.

Ingá Máret vállje alit árvádusa ja árvádus lea:

Makkár biellu ii skila?

– Mun lean nu čuorbi dakkár árvádusain, huff! Measta logan girkobiellu, muhto dat goit skilla. In dieđe vástádusa. BOASTUT!

Rievttes vástádus: Biellorássi.

Galle čuoggá oktiibuot: 2

Juohke gilvaleaddji beassá hástalit ođđa gilvaleaddji Ávvira geassegilvui ja Ingá Máret hástala Elsa-Marja Kappfjell.