Sámi dáiddár Gjert Rognli Gáivuonas eret beassá govaid čájehit dovddus Louvre museas Parisas, ja lea vuosttaš sámi dáiddár gii ovtta máilmmi stuorámus galleriijas čájeha govvadáidaga.
Sámi dáiddár Gjert Rognli Gáivuonas eret beassá govaid čájehit dovddus Louvre museas Parisas, ja lea vuosttaš sámi dáiddár gii ovtta máilmmi stuorámus galleriijas čájeha govvadáidaga.
Sámi govvadáiddár lea bovdejuvvon doallat čájáhusa ovtta máilmmi stuorimus museas Parisas. Musea Louvre lea maid eanemus galleduvvon musea máilmmis gos maid dovddus «Mona Lisa» maleriija lea.
– Ožžon e-boasta galleriijas ja dáiddaprofessoris Mickaella Himmelström gii jearai mus áiggun go čájehit govaid Louvres. Mun in lean eahpádusas ge vástidit ahte áiggun. Dadjen vel sidjiide ahte Ipmeláhčči bures sivdnit din, ja lean nu giitevaš bovdejuvvot Louvrii, muitala Gjert Rognli Ávvirii.
Stuora niehku
Juohke dáiddáris lea okta bajimus nieguin beassat čájehit dáidaga máilmmi stuorimus galleriijas.
– Lea stuora niehku oažžut dakkár bovdehusa ja šiehtadusa, muitala Gjert Rognli lihkolaččat.
Inspirašuvdna duogážis
Iežas duogážis oažžu inspirašuvnna govaide ja dáidagii.
– Mun lean bajásšaddan sámi oskuin, sihke risttalašvuođain ja sámi noaiddástallamiin, mas mun vieččan inspirašuvnna iežan dáidagii. Lean álo ohcalan vuoiŋŋalaš ja spirituealla oasážiid iežan eallimis, čilge Rognli.
Viđát internašunála govvabálkkašumi
«Moscow Internationale foto award» bálkkašumi vuittii dán vahkku, maid juhke Ruoššas.
– Guokte beaivvi áige vuiten mu viđat internašunála govvabálkkašumi, muitala Rognli, gii lea vuoitán maid ovtta internašunála filbmabálkkašumi ovdal.
Gjert Rognli lea multimediadáiddár, ja lea maŋemus jagiid bargan oanehis filmmažiiguin, govvemiin ja čájálmasaiguin. Son lea oahppan multimedias ja filbmasuorggis, ja lea oassálastán ollu filbmafestiválain sihke Norggas ja olgoriikkas.
