Leat olu ovdagáttut ja boasttuipmárdusat sámi kultuvrra ja árbevieruid birra. Mii leat maid vásihan olu negatiiva guottuid loddema birra, sihke eiseválddiin ja dáža servodagas, čállá Guovdageainnu sámiid searvvi nubbijođiheaddji ja NSR Sámediggeáirras Maren Benedicte Nystad Storslett.
Lodden lea dehálaš oassi sámi kultuvrras, seamma ládje go boazodoallu ja guolásteapmi. Norgga eiseválddit eai oro dohkkeheame min sámiid vuoigatvuođa bivdit iežamet árbevirolaš guovlluin. Dál lea áigi ahte stáhta maiddái dohkkeha min rivtti loddet.
Badjel 70 jagi leat Guovdageainnus digaštallan rievtti loddet. Lodden lea dološ árbevierru Sámis ja maid eará árktalaš eamiálbmotguovlluin. Dađibahábut eai leat olbmot Guovdageainnus beassan loddet árbevirolaččat, go bivdu lea nu garrasit gáržžiduvvon. Sii geat leat árbevirolaččat lodden leat láhkarihkkun gártan, ja šaddan máksit sáhkuid dahje giddagasas čoahkkat. Dál lea dálkkádat- ja birasdepartemeantta evttohan ođđa láhkateavstta loddema birra. Dađibahábut ođđa árvalus iige váldde vuhtii sámi árbevieruid ja dohkket sámi vuoigatvuođaid.
Leat olu ovdagáttut ja boasttuipmárdusat sámi kultuvrra ja árbevieruid birra. Mii leat maid vásihan olu negatiiva guottuid loddema birra, sihke eiseválddiin ja dáža servodagas.
Maren Benedicte Nystad Storslett
Leat olu ovdagáttut ja boasttuipmárdusat sámi kultuvrra ja árbevieruid birra. Mii leat maid vásihan olu negatiiva guottuid loddema birra, sihke eiseválddiin ja dáža servodagas. Jáhkán olu dás boahtá unnán dieđuid ja fuomášumi sámi kultuvrra birra, ja erenomážiid min árbevieruid ja eallinvugiid birra. Ii oro ipmárdus mii lodden rievtti mielde lea ja manne dat lea nu dehálaš. Stuora boasttuipmárdus lea goas lodden dáhpáhuvvá. Sátni lodden lea boastut geavahuvvon dárogielas, gos lea jorgaluvvon vårjakt på ender. Lodden ii leat giđđat, muhto giđasdálvvi ovdal monnema. Lea maid dehálaš čilget ahte sámi árbevieru mielde ii galgga váldit eambbo go dárbbaha, ja galgá álo muitit ahte vuollegašvuođain ja giitevašvuođain meahcis vánddardit. Birgejupmi lea vuođđu min luondduávkkástallamis.
Sámi luondduhálddašeapmi ja etihkka ii álo oro heiveme dáža vuogádagaide.
Maren Benedicte Nystad Storslett
Sámi luondduhálddašeapmi ja etihkka ii álo oro heiveme dáža vuogádagaide. Ovdamearka dasa lea bivdu čakčat. Min vieruid mielde ii galgga čivggaid bivdit. Dat galget beassat ráfis stuorrut. Guovdageainnus leat máŋgii árvalan ahte gieldit čakčabivddu dain guovlluin gos árbevirolaš lodden lea. Dalle maid váruha ahte ii šatta badjelmearálaš bivdu.
Vai galgat sáhttit bisuhit árbevieruid čadnon loddemii, fertejit maid Norgga eiseválddit dohkkehit min árbevieruid ja rivttiid. Loddejeaddjit fertejit beassat árbevirolaš guovlluin ja árbevirolaš vugiid mielde loddet, almmá gártat lobiheapmin ja láhkarihkkun. Earri ja šlájat fertejit leat seamma go eará ge guovlluin. Ii leat riekta ahte sámi bivdovuohki galga gáržžiduvvot eambbo go eará bivddut seamma guovlluin. Unnimus gáibádus lea ahte loddejeaddjit besset unnimusat ovtta loddemállása vuoššat bearrašii. Bivdu ferte maid leat báikkálaš hálddašeami vuođul, gos sámi bivdu ja luondduávkkástallan lea vuođđun. Ortnet ferte maiddái leat bistevaš, mas stabilitehta, mii lea seamma dásis go earáge bivddut Norggas.
Lea dehálaš ahte stáda sihkkarastá legitimitehta láhkaárvalussii, vai loddejeaddjit eai šat gártta lobiheapmin. Fertejit čájehit ipmárdusa ja dohkkehit sámi árbevieruid ja rivttiid, vai mii sáhttit sihkkarastit min bivdoárbevieruid boahtteáigái.
