Eastadandihte koronavahátváikkuhusaid eanandoallofitnodagaide, lasiha Innovasjon Norge doarjaga investeremiidda ja fitnodatovdáneapmái.
Doaimmat mat biddjojuvvot johtui, leat erenoamážit daid váste geat masset dietnasiid koronadili dihte, ja fitnodagat main leat olu lassi golut šaddan dan ruvdnoárvvu gáhččama dihte.
– Innovasjon Norge hálddaša ortnegiid eanandoallošiehtadusas mat leat ovdánahttindihte eanandoalu. Olu eanandoalu liigeealáhusat vásihit hástalusaid dan dihte go dábálaš vuovdingaskaoamit eai šat doaimma ja go bálvalusat šaddet gaskaboddosaččat giddejuvvot. Lean movttet go veahkkedoaibmageavaheapmi heivehuvvo nu ahte vuhtiiváldá daid hástalusaid maid ealáhus dál vásiha, lohká eanandoallo- ja biebmoministtar Olaug Bollestad.
– Innovasjon Norge galgá veahkehit ovdánahttit Norgga eanandoalu, maiddái váttis áiggis. Doaimmat maid bidjat eanandoalu ja eanandoallofitnodagaid dihte, leat oassin lasirahčamis mat dál biddjojuvvot johtui Norgga ealáhuseallima váste koronadilis, lohká Innovasjon Norge hálddašeaddji direktevra, Håkon Haugli.
Masset sisaboađu
Olu fitnodagat mat áŋgiruššet báikkálaš bibmui ja mat gullet boazoealáhussii, Inn på tunet ja eanandoallomátkeeallimii masset sisaboađu koronadili dihte. Dáidda joavkkuide biddjojuvvot dál guokte ođđa doarjjaortnega.
Vuosttaš ortnet addá fitnodagaide main lea dárbu, ohcat doarjaga ovdaprošeavttaide gávnnahandihte ođđa márkanvejolašvuođaid. Dákkár ovdaprošeavttaide sáhttá addojuvvot 100 proseantta doarjja. Nubbi ortnet addá fitnodagaide vejolašvuođa ohcat doarjaga čađahandihte dárbbašlaš prošeavttaid, ovdamearkka dihte ovdánahttit ođđa márkaniid. Dákkár prošeavttaide sáhttá oažžut 75 proseantta doarjaga.
– Doaimmat maid dál bidjat, leat sáhttán čađahuvvot jođánis heiveheami ja čuovvoleami dihte eiseválddiid bealis. Dat lea addán midjiide viiddiduvvon doaibmavejolašvuođa veahkehit eanandoallofitnodagaid maidda čuohcá dát kriisa, lohká Håkon Haugli preassadieđáhusas.
