Dat nuorat geat viššalit lášmmohallet, eai bártit nu ollu psyhkalaš váttuiguin go eará nuorat, čájeha ođđa iskkus.
Dat nuorat geat viššalit lášmmohallet, eai bártit nu ollu psyhkalaš váttuiguin go eará nuorat, čájeha ođđa iskkus.
Norgga biras- ja biodieđalaš universitehta dutkit ja Álbmotdearvvašvuođainstituhtta leat geahčadan psyhkalaš váttuid oktavuođaid nuoraid gaskkas geat valáštallet ja geat eai valáštala.
– Guorahallan čájehii ahte vuollel 15 proseantta nuorain geat ledje gilvvohallandásis, rahče psyhkalaš váttuiguin. Sii geat lášmmohalle viššalit, muhto eai gilvalan, lei 19 proseantta geat rahče psyhkalaččat. Sii geat eai oba ge lášmmohallan, rahče 27 proseantta psyhkalaččat, čállá Álbmotdearvvašvuođainstituhtta.
Sáhttet árvádallat
Birrasii 20 000 gaskal 13- ja 22-jahkásaš nuora serve guorahallamii.
Dutkit imaštallet lea go nu ahte gilvvohallan valáštallamis lea čadnon psyhkalaš dearvvašvuhtii.
– Mii sáhttit dušše árvádallat manne leat unnit psyhkalaš váttut sin gaskkas geat gilvvohallet, go sin gaskkas geat eai gilvvohala. Sáhttá leat nu ahte gilvvohallan dahká ahte nuorat ohppet bidjat mihtuid ja bargat vai olahit daid. Muhto mii fertet guorahallat dan lagabui ovdal go konkluderet maidege, dadjá Álbmotdearvvašvuođa dutki Jocelyne Clench-Aas.
(©NTB)
